இணையத்தில் ஆபாச வீடியோ பதிவேற்றுவதை தடுக்க இயலாது

புதுடில்லி :
'இணையதளத்தில், பாலியல் ரீதியிலான விஷயங்களை பதிவேற்றம் செய்வதை தடுக்க இயலாது' என, 'கூகுள்' உள்ளிட்ட, தேடுபொறி நிறுவனங்கள், சுப்ரீம் கோர்ட்டில் தெரிவித்து உள்ளன.

பாலியல் ரீதியிலான விஷயங்களை பதிவேற்றம் செய்வதை தடுக்கும் வகையில், கட்டமைப்பை ஏற்படுத்தும்படி, 'கூகுள், யாகூ, மைக்ரோசாப்ட்' போன்ற தேடுபொறிகளையும், 'பேஸ்புக், வாட்ஸ் ஆப்' போன்ற சமூக வலைதளங்களையும், பிப்., 1ல், சுப்ரீம் கோர்ட் உத்தரவிட்டது.


தடுக்க இயலாது


இது தொடர்பான வழக்கு, நேற்று, சுப்ரீம் கோர்ட் நீதிபதிகள், மதன் லோகுர், உதய் லலித் அடங்கிய அமர்வு முன் விசாரணைக்கு வந்தது. அப்போது, தேடுபொறி நிறுவனங்கள் சார்பில் ஆஜரான வழக்கறிஞர்கள், 'இணையதளத்தில், பாலியல் ரீதியிலான விஷயங்களை பதிவேற்றம் செய்வதை தடுக்க இயலாது' என, தெரிவித்தனர்.

'யு - டியூபில் மட்டும், நிமிடத்திற்கு, நான்கரை மணி நேர வீடியோக்கள், பதிவேற்றம் செய்யப்படுகின்றன. ஒவ்வொன்றையும் கண்காணித்து தடுக்க, லட்சக்கணக்கான ஊழியர்களை பணியமர்த்த வேண்டும்; அது, சாத்தியமன்று' என, அவர்கள் கூறினர்.
-
தினமலர்