கோஹினூர் வைரத்தை மீட்க இயலாது: மத்திய அரசு

புதுடில்லி :
பிரிட்டன் சொத்தாக மாறிய இந்தியாவின் கோஹினுார்
வைரத்தை மீ்ண்டும் இந்தியாவுக்கு திரும்பக் கொண்டு
வர இயலாது என மத்திய அரசு தெரிவித்துள்ளது.

104 கேரட் கொண்ட கோஹினுார் வைரம், இந்திய
சுரங்கத்தில் சுமார் 800 ஆண்டுகளுக்கு முன் தோண்டி
எடுக்கப்பட்டது. இவ்வைரம் காகதீய ராஜவம்சத்தினருக்கு
சொந்தமானது.

அதன்பின் பல ஆக்கிரமிப்பாளர்களிடம் கைமாறிய வைரம்,
தற்போது இங்கிலாந்து அரசியின் சொத்தாக , லண்டன்
டவரில் பொதுமக்களின் பார்வைக்காக வைக்கப் பட்டுள்ளது.

இதுகுறித்து சுப்ரீம் கோர்ட்டில் நடந்த ஒரு பொது நல
வழக்கில், கோஹினுார் வைர விவகாரத்தில் மத்திய அரசின்
நிலையை ஒரு வாரத்தில் தெரிவிக்க வேண்டும் என நீதிபதி
டி.எஸ்.தாக்கூர் தலைமையிலான அமர்வு உத்தரவிட்டிருந்தது.

இந்நிலையில் கோஹினுார் வைரத்தை இந்தியா கொண்டு
வருவது குறித்து, தகவல் அறியும் உரிமைச் சட்டத்தின் கீழ்
கேட்கப்பட்ட கேள்விக்கு, வைரத்தை திரும்ப கொண்டு வர
முடியாது என மத்திய கலை மற்றும் பண்பாட்டுத் துறை
அமைச்சகம் பதிலளித்துள்ளது.

-
மேலும், தொல்லியல் மற்றும் கலைப் பொருட்கள் பாதுகாப்புச்
சட்டம் 1972-ன்படி, சுதந்திரத்துக்கு முன் இந்தியாவிலிருந்து
கொண்டு செல்லப்பட்ட பொருட்களை மீண்டும் இந்தியாவுக்கு
கொண்டு வர இயலாது என்றும் பிரிட்டன் அரசின் பாதுகாப்பில்
உள்ள தொல்லியல் பொருட்களின் பட்டியல், இந்திய
தொல்லியல் துறையிடம் இல்லை என்றும் தெரிவித்துள்ளது.
–
————————————-
தினமலர்