ஜெயக்குமார் பதவி பறிபோகுமா ?

சென்னை:
தினகரனுக்கு எதிராக பேசியதால் அமைச்சர் ஜெயக்குமார்
பதவி பறிபோகுமா ? என்ற கேள்வி எழுந்துள்ளது.

தினகரன் ஜெயிலில் இருந்து வெளியே வந்ததும்,
அவரை யாரும் சந்திக்க மாட்டோம். அவர் கட்சியில் இருந்து
ஒதுங்கியே இருப்பார் என்று அமைச்சர் ஜெயக்குமார்
நிருபர்களிடம் வெளிப்படையாக தெரிவித்தார்.

இந்த பேச்சு தினகரன் ஆதரவு எம்எல்ஏ.,க்கள் மத்தியில் பரபரப்பை
ஏற்படுத்தியது. இதனால் இன்று காலை முதல் பல எம்.எல்.ஏ.,க்கள்
தினகரை சந்தித்து வருகின்றனர். எம்.எல்.ஏ., தங்க தமிழ்செல்வன்
நிருபர்களிடம் பேசுகையில்; அதிமுக ஒரே அணியாகத்தான் உள்ளது.

தினகரனை மரியாதை நிமித்தமாக சந்தித்தோம். ஓபிஎஸ் போல்
நாங்கள் செயல்பட மாட்டோம். கட்சி தொடர்பான நடவடிக்கையை
சசிகலா மட்டும்தான் எடுக்க முடியும்.

தினகரனுக்கு எதிராக பேசிய ஜெயக்குமார் பொதுசெயலாளரை மீறி
பேசி வருகிறார். இது செல்லத்தக்கதல்ல. அவர் மீது நிச்சயம்
நடவடிக்கை வரும். இவ்வாறு அவர் தெரிவித்தார்.

எம்.எல்.ஏ., கலைச்செல்வன் நிருபர்களிடம் பேசுகையில்; கட்சி
என்றால் அது பொதுசெயலர் தான், அடுத்து துணை
பொதுசெயலர்தான், அமைச்சர் ஒருவர் சொல்வதையெல்லாம்
ஏற்க முடியாது என்றார்.

தினகரன் ஆதரவாளர்கள் ஜெயக்குமாருக்கு எதிராக பேசியிருப்பதால்
ஜெயக்குமார் அமைச்சர் பொறுப்பில் இருந்து நீக்கப்படுவாரா, அவ்வாறு
நீக்கப்பட்டால் கட்சிக்குள் மேலும் குழப்பம் வருமா என்ற சூழல்
உருவாகியுள்ளது.

ஜெயக்குமார் குறித்து நாஞ்சில் சம்பத் கூறியதாவது:
ஜெயக்குமார் என்ன கட்சியின் செய்தி தொடர்பாளரா ?
வரம் தந்த சாமியின் தலையில் கை வைத்து பார்க்கிறார்.
தலைமை செயலகத்தில் முதல்வர் படத்தை வைப்பது மரபுதான்.
இவ்வாறு அவர் கூறியுள்ளார்.
-
------------------------------
தினமலர்