அசாமில் மூங்கிலில் தயாரான 101 அடி உயர துர்கா சிலை

-
கவுகாத்தி,

அசாம் மாநிலம், கவுகாத்தியில், துர்கா பூஜையையொட்டி,
5,000 மூங்கில்களை பயன்படுத்தி உருவாக்கப்பட்டுள்ள,
101 அடி உயர துர்கா சிலை, 'கின்னஸ்' சாதனை புத்தகத்தில்
இடம்பெற உள்ளது.

அசாமில், பா.ஜ.,வைச் சேர்ந்த, சர்பானந்தா சோனவால்
முதல்வராக உள்ளார். இம்மாநிலத்தின், கவுகாத்தி நகரில்,
துர்கா பூஜை கொண்டாட்டத்தையொட்டி, பிஷ்னுபூர்
சர்போஜன் துர்கா பூஜை கமிட்டிக்காக, 101 அடி உயர, துர்கா
சிலை உருவாக்கப்பட்டு உள்ளது.

இதற்கு, 5,000 மூங்கில்கள் பயன்படுத்தப் பட்டுள்ளன.
கலை இயக்குனர், நுாருதீன் அஹமது தலைமையில்,
40 கலைஞர்கள், துர்கா சிலை தயாரிப்பு பணியில் தீவிரமாக
ஈடுபட்டனர்.இது, மூங்கிலால் உருவாக்கப்பட்ட, உலகின்
மிக உயரமான சிலை என, கின்னஸ் சாதனை புத்தகத்தில்
இடம் பெற உள்ளதாக தகவல்கள் கூறுகின்றன.

இந்த சிலையை உருவாக்கிய, நுாருதீன் அஹமது, 1975 முதல்,
துர்கா சிலைகளை உருவாக்கி வருகிறார். ''ஒரு கலைஞனுக்கு,
மதம் என்பது கிடையாது. என் மதம், மனித சமுதாயத்துக்கு
சேவை ஆற்றுவதே,'' என, நுாருதீன் தெரிவித்தார்.

துர்கா சிலை, உலோகம், பிளாஸ்டிக் இல்லாமல், முழுவதும்
மூங்கிலால் உருவாக்கப்பட்டு உள்ளதாக, சிலை தயாரிப்பு
மேற்பார்வையாளர், தீப் அஹமது தெரிவித்தார்.
-
-----------------------------------
தினமலர்