அரசியல் கட்சிகளுக்கு நிதி: சுப்ரீம் கோர்ட் ‛நோட்டீஸ்'

புதுடில்லி:
அரசியல் கட்சிகள் நன்கொடை பெறும் விவகாரம் தொடர்பாக,
மத்திய அரசு அமல்படுத்தி உள்ள, புதிய சட்டத்திருத்தத்தை
எதிர்த்து, அரசு சாரா தொண்டு நிறுவனம் சார்பில், சுப்ரீம்
கோர்ட்டில், பொதுநல மனு தாக்கல் செய்யப்பட்டு உள்ளது;

இதற்கு பதிலளிக்கும்படி, மத்திய அரசு, தேர்தல் கமிஷனுக்கு
சுப்ரீம் கோர்ட், 'நோட்டீஸ்' அனுப்பி உள்ளது.

அரசியல் கட்சிகள் நன்கொடை பெறுதல், நிதி திரட்டுதல்
தொடர்பாக, சில விதிகளை தளர்த்தி, சட்டத்திருத்த மசோதா,
பார்லி.,யில் நிறைவேற்றப்பட்டது. இதையடுத்து, அந்த மசோதா,
சட்ட வடிவம் பெற்றுள்ளது.

இதன்படி, அரசியல் கட்சிகளுக்கு, கார்ப்பரேட் நிறுவனங்கள்
நிதி வழங்குவதில், முன்பிருந்த விதிகள் தளர்த்தப்பட்டு உள்ளன.

பத்திரங்களாக நன்கொடைகள் பெறும் அரசியல் கட்சிகள்,
அதற்கான நிதி ஆதாரத்தை, காண்பிக்க வேண்டிய அவசியம்
இல்லை என்ற நடைமுறையும், அமலில் உள்ளது. இந்த சட்டத்
திருத்தத்திற்கு எதிர்ப்பு தெரிவித்து, அரசு சாரா தொண்டு
நிறுவனத்தின் சார்பில், சுப்ரீம் கோர்ட்டில், பொதுநல மனு
தாக்கல் செய்யப்பட்டு உள்ளது.

இந்த மனுவை, பிரபல வழக்கறிஞர், பிரசாந்த் பூஷண் தாக்கல்
செய்தார்.

இம்மனுவை விசாரித்த, சுப்ரீம் கோர்ட் தலைமை நீதிபதி,
தீபக் மிஸ்ரா தலைமையிலான அமர்வு, இது குறித்து விளக்கம்
அளிக்கும்படி, மத்திய அரசு மற்றும் தேர்தல் கமிஷனுக்கு
, 'நோட்டீஸ்' அனுப்பி உள்ளது.
-
----------------
தினமலர்