தாஜ்மஹால் புனரமைப்பு; ரூ.156 கோடியில் திட்டம்

லக்னோ:
ஆக்ராவில் அமைந்துள்ள, உலக அதிசயங்களில் ஒன்றான,
தாஜ்மஹால் மற்றும் அதன் சுற்றுப்பகுதிகளை, 156 கோடி
ரூபாய் செலவில் மேம்படுத்துவதற்கான திட்டத்தை, மத்திய
அரசின் ஒப்புதலுக்கு, அனுப்பி உள்ளதாக, உத்தர பிரதேச
அரசு தெரிவித்துள்ளது.

உத்தர பிரதேசத்தில், முதல்வர் யோகி ஆதித்யநாத்
தலைமையிலான, பா.ஜ., ஆட்சி நடக்கிறது. சமீபத்தில்,
மாநிலத்தில் உள்ள சுற்றுலா தலங்கள் குறித்த பட்டியல்
வெளியிடப்பட்டது.

அதில், வாரணாசி, அயோத்தி மற்றும் மதுரா ஆகியவை, முதல்
மூன்று இடங்களில் உள்ளன.

உலக அதிசயங்களில் ஒன்றாக கருதப்படும் தாஜ்மஹால்,
சுற்றுலா தலங்கள் பட்டியலில் இருந்து நீக்கப்பட்டுள்ளது;
இதற்கு, பல்வேறு தரப்பினர் எதிர்ப்பு தெரிவித்து வருகின்றனர்.

இந்நிலையில், உலக வங்கியின் பரிந்துரைப்படி, மாநில சுற்றுலா
துறையை மேம்படுத்த, 370 கோடி ரூபாய் மதிப்பிலான
திட்டங்களை, மாநில அரசு தயாரித்துள்ளது.

மத்திய அரசின் ஒப்புதலுக்கு அனுப்பப்பட்ட இந்த திட்டங்களில்,
தாஜ்மஹால் மற்றும் அதன் சுற்றுப்புற மேம்பாட்டுக்கு மட்டும்,
156 கோடி ரூபாய் ஒதுக்கப்பட்டுள்ளது.

'மத்திய அரசின் ஒப்புதல் கிடைத்ததும், மூன்று மாதங்களில்,
திட்டப் பணிகள் துவங்கும்' என, மாநில அரசு தரப்பில்
தெரிவிக்கப்பட்டுள்ளது.
-
-----------------
தினமலர்