'நிர்பயா' ஏவுகணை சோதனை வெற்றி

-
பாலசோர்:
முழுவதும் உள்நாட்டிலேயே வடிவமைக்கப்பட்டு, தயாரிக்கப்பட்டுள்ள,
நீண்ட துார இலக்கை தாக்கக் கூடிய, 'நிர்பயா' ஏவுகணை, நேற்று
வெற்றிகரமாக சோதித்து பார்க்கப்பட்டது.

உள்நாட்டு தொழில்நுட்பத்துடன் உருவாக்கப்பட்டுள்ள,
'நிர்பயா' ஏவுகணை, 2013ல், முதல் முறையாக செலுத்தி சோதனை
செய்யப்பட்டது. இதுவரை நான்கு முறை நடத்தப்பட்ட சோதனையில்,
இரண்டாவது சோதனை மட்டுமே வெற்றி கரமாக அமைந்தது.
மற்ற மூன்று சோதனைகளும், தொழில்நுட்பக் கோளாறுகளால்
பாதியில் நிறுத்தப்பட்டன.

ஒடிசா மாநிலம், பாலசோரில் உள்ள ராணுவ தளத்தில் இருந்து,
நிர்பயா ஏவுகணையின் ஐந்தாவது சோதனை, நேற்று காலை நடந்தது.
இது வெற்றிகரமாக அமைந்ததாக, டி.ஆர்.டி.ஓ., எனப்படும் ராணுவ
ஆராய்ச்சி மற்றும் மேம்பாட்டு அமைப்பு தெரிவித்துள்ளது.

இரண்டு அடுக்குகள் உடைய இந்த ஏவுகணை, 1,000 கி.மீ.,
தொலைவில் உள்ள இலக்கை தாக்கும் திறன் உடையது.
இந்த ஏவுகணையுடன், 300 கிலோ எடையுள்ள அணு ஆயுதத்தையும்
செலுத்த முடியும். மேலும், 24 வகையான ஆயுதங்களையும் ஏந்திச்
செல்லும் திறனும், ஒரே நேரத்தில் பல இடங்களில் தாக்கும் திறனும்,
இந்த ஏவுகணைக்கு உள்ளது.
-
------------------------------------
தினமலர்