காதலர் தினத்துக்கு பஜ்ரங் தள் எச்சரிக்கை

-


ஐதராபாத்:
'தெலுங்கானா மாநிலம், ஐதராபாதில், காதலர் தினத்தன்று,
கிளப் மற்றும் ஓட்டல்களில், சிறப்பு நிகழ்ச்சிகள் எதுவும் நடத்தக்
கூடாது' என, பஜ்ரங்தள் அமைப்பினர் எச்சரிக்கை விடுத்துள்ளனர்.

உலகம் முழுவதும், காதலர் தினம், நாளை(பிப்.,14) கொண்டாடப்பட
உள்ளது. இதை முன்னிட்டு, பூச்செண்டுகள், பரிசு பொருட்கள்
விற்பனை, களைகட்ட துவங்கி உள்ளன.இந்நிலையில்,

'வெளிநாட்டு கலாசாரமான காதலர் தினத்தை, இந்தியாவில்
கொண்டாடக் கூடாது' என, பஜ்ரங்தள் உள்ளிட்ட சில அமைப்புகள்
எதிர்ப்பு தெரிவிக்கின்றன.

இதையடுத்து, 'ஐதராபாதில் உள்ள கிளப் மற்றும் ஓட்டல்களில்,
காதலர் தினத்துக்காக, சிறப்பு நிகழ்ச்சிகள் எதுவும் நடத்தக்
கூடாது' என, பஜ்ரங்தள் அமைப்பினர் எச்சரிக்கை விடுத்துள்ளனர்.

மேலும், வாழ்த்து அட்டை, பரிசு பொருட்கள், பூங்கொத்து விற்கும்
கடைகளிலும், காதலர் தினத்துக்காக, ஸ்பெஷலாக எதுவும்
விற்பனை செய்யக் கூடாது என்றும், எச்சரிக்கை விடுத்துள்ளனர்.

அன்று, பொது இடங்களில் காதலர்கள் தாக்கப்படலாம் என்ற
அச்சம் எழுந்து உள்ளதால், ஐதராபாத்தில், இளைஞர்கள் கூடும்
இடங்களில், போலீசார் பாதுகாப்புக்கு ஏற்பாடு செய்துள்ளனர்.
-
---------------------------------------------
தினமலர்