தனுஷ்கோடி கடலில் ரூ.300 கோடியில் காற்றாலை

ராமேஸ்வரம்:
தனுஷ்கோடி கடலில் ரூ.300 கோடியில் காற்றாலை அமைய உள்ளதாக
மத்திய மரபுசாரா எரிசக்தி துறை இணை செயலாளர் பானுபிரதாப்
தெரிவித்தார்.

1974ல் வங்கக்கடலில் உருவான புயல் தனுஷ்கோடியை தாக்கியதில்
சாலை வசதியின்றி துண்டிக்கப்பட்ட தனுஷ்கோடிக்கு ரூபாய்
59 கோடியில் புதிய சாலை அமைத்து, ஜூலையில் பிரதமர் மோடி
திறந்து வைத்தார்.

இந்நிலையில் மத்திய அரசு, ரூபாய் 300 கோடியில் தனுஷ்கோடி
கடற்கரையில் இருந்து 100 மீட்டர் துார கடலில் கான்கிரீட் துாண்களுடன்
5 காற்றாலைகள் அமைக்க உள்ளது.

இதற்காக தனுஷ்கோடியில் நேற்று மத்திய மரபுசாரா எரிசக்தி துறை
இணை செயலாளர் பானுபிரதாப் ஆய்வு செய்து, மாவட்ட கலெக்டர்
நடராஜன் உட்பட அதிகாரிகளுடன் ஆலோசனை நடத்தினார்.

பின் பானுபிரதாப் கூறியதாவது :சுற்றுச்சூழல் பாதிப்பின்றி இந்தியாவில்
முதன் முதலாக தனுஷ்கோடி கடலில் 4 முதல் 5 காற்றாலை அமைக்க
மத்திய அரசு ஒப்புதல் அளித்தது.

இங்கு ஒரு காற்றாலை மூலம் ராமேஸ்வரம் நகரின் மின் தேவை
பூர்த்தியாகும். கூடுதலாக கிடைக்கும் மின்சாரம் மாநில அரசு பிற
பகுதிக்கு பகிர்ந்து கொடுக்கப்படும், என்றார்.
-
-----------------------------------
தினமலர்