இரட்டை இலை சின்னம் பெற லஞ்சம்: 15 ஆடியோ சி.டி.க்கள் டெல்லி கோர்ட்டில் தாக்கல்

புதுடெல்லி:

ஜெயலலிதா மறைவுக்கு பிறகு அ.தி.மு.க. கட்சியின் சின்னமான
இரட்டை இலை சின்னத்துக்கு இரு அணியினர் உரிமை
கோரியதில் சின்னம், கட்சியின் பெயரை தேர்தல் கமி‌ஷன் முடக்கியது.

ஆவணங்கள் மற்றும் பிரமாண பத்திரங்கள் அடிப்படையில்
முதல்-அமைச்சர் எடப்பாடி பழனிசாமி- ஓ.பன்னீர் செல்வம் அணிக்கு
இரட்டை இலை சின்னத்தை தேர்தல் கமி‌ஷன் ஒதுக்கியது.

இதற்கிடையே இரட்டை இலை சின்னம் பெற தினகரன் இடைத்தரகர்
சுகேஷ் சந்திரசேகர் மூலம் தேர்தல் கமி‌ஷனுக்கு லஞ்சம் கொடுக்க
முயன்றதாக டெல்லி போலீசார் வழக்கு பதிவு செய்தனர்.

இது தொடர்பாக தினகரன், அவரது நண்பர் மல்லிகார் ஜூனா,
சுகேஷ் சந்திர சேகர், நரேஷ், லலித்குமார் ஆகியோர் கைது
செய்யப்பட்டு டெல்லி திகார் சிறையில் அடைக்கப்பட்டனர்.
இதில் சுகேஷ்சந்திரசேகர் தவிர மற்றவர்கள் ஜாமீனில்
விடுதலையானார்கள்.

இது தொடர்பான வழக்கு டெல்லி பாட்டியாலா சிறப்பு கோர்ட்டில்
நடந்து வருகிறது.விசாரணையின் போது வழக்கின் ஆதாரங்களை
சி.டி.யாக கோர்ட்டில் தாக்கல் செய்ய வேண்டும் என்று டெல்லி
போலீசாருக்கு நீதிபதி அரவிந்த்குமார் உத்தரவிட்டு இருந்தார்.

இன்று இந்த வழக்கு விசாரணைக்கு வந்தது. தினகரன்- சுகேஷ்
பேசியதாக கூறப்படும் 15 ஆடியோ சி.டி.க்களை போலீசார்
கோர்ட்டில் தாக்கல் செய்தனர்.

இந்த வழக்கு வருகிற 15-ந்தேதிக்கு ஒத்தி வைக்கப்பட்டது.
மேலும் சுகேசும் கோர்ட்டில் ஆஜர்படுத்தப்பட்டார். அவரது
காவலையும் 15-ந்தேதி வரை நீட்டிக்கப்பட்டது.
-
-------------------------------------
மாலை மலர்