கோவை: செம்மொழி மாநாட்டில் பங்கேற்க வரும் வெளியூர் மக்களுக்கு உதவ,

கோவை: செம்மொழி மாநாட்டில் பங்கேற்க வரும் வெளியூர் மக்களுக்கு உதவ, கோவை மாநகர போலீஸ் சார்பில் 15 இடங்களில் "காவல் உதவி மையம்' அமைக்கப்படுகிறது.
கோவை நகரில், செம்மொழி மாநாடு நாளை மறுநாள் துவங்குகிறது. மாநாடு பணிகள் அனைத்தும் முடிவடைந்த நிலையில் ரயில், பஸ், விமானம் மூலம் பல்வேறு இடங்களில் இருந்து வரும் மக்களுக்கு உதவ கோவை மாநகர போலீஸ் மற்றும் ஏர்செல் நிறுவனம் சார்பில் "காவல் உதவி மையங்கள்' அமைக்கப்படுகின்றன. கோவை ரயில்வே ஸ்டேஷன், மேட்டுப்பாளையம் ரோடு மாநகராட்சி பஸ் ஸ்டாண்ட், பீளமேடு விமான நிலையம், காந்திபுரத்தில் உள்ள திருவள்ளுவர் பஸ் ஸ்டாண்ட், மத்திய பஸ் ஸ்டாண்ட், சிங்காநல்லூர் மற்றும் உக்கடம் பஸ் ஸ்டாண்ட், அரசு மருத்துவமனை, வ.உ.சி.பூங்கா, சிந்தாமணிபுதூர் சந்திப்பு, மாநகர போலீஸ் கமிஷனர் அலுவலகம், காளப்பட்டி சந்திப்பு, கற்பகம் கல்லூரி சந்திப்பு, நீலம்பூர் மற்றும் கொடிசியா ஆகிய இடங்களில் இம்மையங்கள் செயல்படும்.
கோவை ரயில்வே ஸ்டேஷனில் அமைக்கப்பட்டுள்ள காவல் உதவி மையத்தை போலீஸ் கமிஷனர் சைலேந்திரபாபு நேற்று திறந்து வைத்தார். நிகழ்ச்சியில், போலீஸ் துணைக்கமிஷனர் காமினி முன்னிலை வகித்தார். ரயில்வே போலீஸ் மற்றும் ரயில்வே பாதுகாப்பு படை அதிகாரிகள் பங்கேற்றனர். மாநகர காவல் உதவி மையங்களில், சிறப்பு பயிற்சி பெற்ற கல்லூரி மாணவ, மாணவிகள், ஏர்செல் நிறுவன ஊழியர்கள் பணியாற்றுவர். மாநாட்டு நிகழ்ச்சி நிரல், அவசர உதவிக்கான மொபைல் போன் எண்கள் மற்றும் போக்குவரத்து வழித்தடங்கள் தொடர்பான விபரங்களை, வெளியூர் மக்கள் இம்மையத்தில் தெரிந்து கொள்ளலாம்.
மாநகர போலீசார் கூறுகையில், " மாநாட்டில் பங்கேற்க வருவோர், அவச உதவி தேவைப்படும் போது "சிறப்பு கட்டுப்பாட்டு அறை' போலீசாரை 737311 11111, 73736 66666, 73732 22222, 73734 44444 மற்றும் 73730 00002 என்ற எண்களில் தொடர்பு கொள்ளலாம். தவிர, 73730 00000 என்ற இலவச சேவை எண்ணிலும் தொடர்பு கொள்ளலாம். ஏர்செல்லில் இருந்து இந்த எண்ணை தொடர்பு கொள்ள கட்டணம் கிடையாது' என்றனர்.