மஹா சிவராத்திரி - சிவனோடு ஓர் இரவு - இறுதி

by பித்தன் Sun Mar 10, 2013 5:03 pm

ஆசனம் என்பது எதோ வித்தை செய்பவர்களை போல் வளைப்பது மட்டும் அல்ல, உடலின் இருக்கை நிலை என்பதே ஆசனம் என்பதன் பொருள். உங்கள் உடலை நீங்கள் எப்படி வைத்து இருந்தாலும் பித்தனால் ஒரு ஆசனத்தை தொடர்பித்து சொல்லிவிட முடியும்.

பதஞ்சலி நீங்கள் வசதியாக சம்மணம் இட்டு அமரும் நிலையை கூட ஒரு ஆசனம் என்று சொல்கிறார்.
சரி, அவனோடு இருப்போம். மகா சிவராத்திரி (இன்று )அன்று விரதம் இருந்து விரதம் நிறைவு செய்யும் போது மிக எளிய உணவு அல்லது பழங்கள் மற்றும் இயற்கை உணவு
எடுத்து இரவு தயாராக இருப்பது நல்லது.

சிவனை யோக மரபில் தெய்வமாக அல்லாமல் குருவாக மட்டுமே காணுகின்றோம். முதலில் ஈசன் முதல் குருவாக இருந்து ஏழு பேருக்கு ஞானம் வழங்கினார். அவர்களே சப்த ரிஷிகள் என அழைக்கப்படுகின்றனர்.

இயல்பில் குரு இல்லாத கற்பிதம் கண் கட்டிக்கொண்டு ஓவியம் கற்பதை போன்றது. ஆனால் ஈசன் உங்களின் மெய்ஞான உள்ளொளி வளர்ச்சிக்கு அருள் தரும் நாள்தான்
மகா சிவராத்திரி .

ஏதேனும் ஒரு சிவாலயத்தில், உங்கள் முதுகு தண்டு நேராக இருக்குமாறு அமர்ந்து, உங்கள் தலை சிறிது மேல் முகமாக வைத்து, கண்களை மூடிக்கொள்ளுங்கள்.கண்கள் மூடி இருக்கும் போது உங்கள் நினைவுகளின் கற்பனை களியாட்டம் துவங்கும், மென்மையாக உங்களின் சுவாசம் கவனிக்க துவங்குங்கள். ஒரு நிமிடத்துக்கு பிறகு "ஓம் நமசிவாய :" எனும் பஞ்ச அட்சரத்தை 101 முறை சொல்லவும் (கூடவோ , குறைவாகவோ சொன்னால் தவறில்லை, கவனம் பஞ்ச அட்சரத்தில் இருக்கட்டும், எண்ணிக்கையில் வேண்டாமே ). உங்கள் உடலின் சக்தி நிலை உங்களை அறியாமல் உயரும். இரவெல்லாம் முதுகு தண்டு நேராக வைத்து
விழித்து இருங்கள்.

இது ஈசனின் ஓர் இரவு
கைலாசனின் இரவு
துறவு கொண்ட மெய்ஞானிகள்,
அரவு பூண்ட ஞான குரு
குறை பிறை தலை மேற் கொண்ட
விடம் உண்ட , நீல கண்டன் அருள்
தேடும் இரவு.

உங்களின் உடலில் ஆற்றல் சக்கரங்கள் 7
மூலாதாரம்
சுவாதிஷ்டானம்
மணிபூரகம்
அனாகதம்
விஷுக்தி
ஆக்னா
துரியம்

இந்த ஆற்றல் சக்கரம் கிளர்ந்து உயர ஈசனே குருவாக அமைந்து அருளும் இரவே இன்று.

அல்லல் என் செயும் , அரு வினை என் செயும்
தொல்லை வல்வினைத் தொந்தம்தான் என் செயும்
தில்லை மா நகர்ச் சிற்றம்பலவனார்க்கு
எல்லை இல்லது ஓர் அடிமை பூண்டானுக்கே.

-திரு நாவுக்கரசர்.
இந்த கட்டுரைத் தொடரை வாசித்தால் இந்து சமயத்தில் உள்ளது அனைத்தும் எதோ அறிவியல் சாரம் கொண்டது போல் உணர்ந்தால் உங்களுக்கு ஒரு உவமை மட்டும் பித்தன் சொல்வான் . ஒரு சின்ன குழந்தை சொன்னதாம் தன் தாயிடம் அம்மா நீ என்னைப்போல் இருக்கிறாய் என்று.