கேரளா இனி கேரளம்

கேரளா இனி கேரளம்
திருவனந்தபுரம், ஜூலை. 15-
கேரள மாநிலத்தை இனி கேரளம் என்று அழைப்பதற்கான நடவடிக்கைகள் எடுக்கப்படும் என முதல்வர் வி.எஸ். அச்சுதானந்தன் சட்டப்பேரவையில் அறிவித்தார்.
கேரள சட்டப் பேரவையில் முதல்வர் அச்சுதானந்தன் புதன்கிழமை பேசியதாவது: கேரள மாநிலம் வழக்கிலும், அதிகாரப்பூர்வமாகவும் கேரளா என்று அழைக்கப்பட்டு வருகிறது. ஆனால் மலையாளத்தில் கேரளம் என்பதே சரி. மலையாளத்தில் கேரளம் என்றே எழுதியும் பேசியும் வருகிறோம். எனவே கேரளா என்பதை கேரளம் என்று பெயர் மாற்றம் செய்வதற்கான நடவடிக்கைகள் துவங்கும்.
இதுதொடர்பாக கட்சிகளுடனும், நிபுணர்களுடனும் கலந்தாலோசனை நடத்தி ஒருமித்த முடிவு எடுக்கப்படும் என்றார் அவர்.
முன்னதாக பேரவையில் இதுகுறித்து மார்க்சிஸ்ட் கம்யூனிஸ்ட் கட்சி எம்எல்ஏ பாபு எம். பளிச்சேரி பேசியதாவது: கேரளம் என்றால் கேராஸ் வகையிலான தென்னை மரங்கள் நிறைந்த பகுதி என்று அர்த்தம். எனவே கேரளா என்ற பெயரை கேரளம் என்று மாற்றவேண்டும் என பல ஆண்டுகளாக கோரிக்கை விடுத்து வருகிறோம். மலையாளத்தில் கேரளம் என்று எழுதுவது, பேசுவதைப் போல பெயரையும் அதிகாரப்பூர்வமாக மாற்றவேண்டும். பம்பாயை மும்பை என்று மாற்றியது போல கேரளம் என்று மாற்றவேண்டும்.
பிரிட்டிஷார் காலத்தில் திருச்சூர் என்பதை திரிச்சூர் என்றும், கோழிக்கோட்டை காலிக்கட் என்றும் அழைத்து வந்தனர். அந்த பெயர்கள் தற்போது மாற்றப்பட்டு திருச்சூர், கோழிக்கோடு என்றே அழைக்கப்படுகின்றன. அதைப் போலவே கேரளா என்ற பெயரையும் கேரளம் என்றே மாற்றிவிடலாம் என்றார் அவர்.