தினபூமி ஆசிரியர் கைதுக்கு ஜெயலலிதா கண்டனம்

by Guest Sun Jul 25, 2010 6:11 pm

தினபூமி ஆசிரியர் கைதுக்கு ஜெயலலிதா கண்டனம்

தினபூமி ஆசிரியர் கைதுக்கு ஜெயலலிதா கண்டனம் EmailButton

on 25-07-2010 02:10

தினபூமி ஆசிரியர் கைதுக்கு ஜெயலலிதா கண்டனம் New

Favoured : 2

Published in : செய்திகள், தமிழகம்

சமீபத்தில் தினபூமி ஆசிரியர் மணிமாறன் மற்றும் அவரது மகன் ராஜேஸ் குமார் ஆகியோர் காவல்துறையால் கைது செய்யப்பட்டு சிறையில் அடைக்கப்பட்டுள்ளனர். தினபூமி நாளிதழின் ஆசிரியர் கைது செய்யப்பட்டுள்ளதற்கு அதிமுக பொதுச்செயலர் ஜெயலலிதா கண்டனம் தெரிவித்துள்ளார். இதுகுறித்து அவர் இன்று வெளியிட்டுள்ள அறிக்கையில் கூறியிருப்பதாவது:

ஜனநாயகத்தின் நான்காவது தூணாக விளங்குவது பத்திரிகைத் துறை. நாட்டில் நடைபெறும் அக்கிரமங்களையும், அநியாயங்களையும், ஆட்சியாளர்களின் சர்வாதிகாரப் போக்கையும் மக்களுக்கு எடுத்துரைக்கும் உன்னதமான கடமையை பத்திரிகைகள் செய்து வருகின்றன.

இந்த வகையில், அரசு விதிமுறைகளை மீறி கோடிக்கணக்கான ரூபாய் மதிப்பிலான கிரானைட் கற்கள் கடத்தப்படுவது குறித்து ‘தினபூமி’ நாளிதழ் செய்தி வெளியிட்டிருக்கிறது. இந்தச் செய்தியை வெளியிட்டதற்காக ‘தினபூமி’ நாளிதழின் ஆசிரியர் மணிமாறன், அவரது மகன் எம். ரமேஷ்குமார் மற்றும் எம். முத்தையா ஆகியோர், காவல் துறையினரால் 21.7.2010 விடியற்காலையில் கைது செய்யப்பட்டதோடு, அவர்கள் மீது ஜாமீனில் வெளிவர முடியாத பிரிவுகளின் கீழ் வழக்குகள் பதிவு செய்யப்பட்டன.

பத்திரிகையாளர்கள் மத்தியிலும், பொதுமக்கள் மத்தியிலும் இதற்கு பலத்த எதிர்ப்பு கிளம்பியதை அடுத்து, அவர்களை ஜாமீனில் விடுதலை செய்ய எதிர்ப்பு தெரிவிக்க வேண்டாம் என்று கருணாநிதி ஆலோசனை வழங்கியிருக்கிறார். கருணாநிதியின் இந்த இரட்டை வேடத்தை நினைக்கும் போது ‘பிள்ளையையும் கிள்ளிவிட்டு தொட்டிலையும் ஆட்டுகின்ற’ பழமொழி தான் நினைவிற்கு வருகிறது.

காவல் துறையால் மேற்படி பத்திரிகையாளர்கள் மீது பதிவு செய்யப்பட்ட பொய் வழக்குகள் அனைத்தும் உடனடியாக ரத்து செய்யப்பட வேண்டும் என்று வலியுறுத்தி கேட்டுக் கொள்கிறேன்.

ஏற்கெனவே தமிழ்நாட்டின் கனிம வளமான மணல் தி.மு.க-வினரால் தமிழகம் எங்கும் கொள்ளையடிக்கப்பட்டு வருகிறது. கிரானைட் கற்கள் கடத்தப்படுவது குறித்து சென்னை உயர் நீதிமன்றத்தில் வழக்கு நிலுவையில் இருக்கும் போது, இது போன்ற கைது நடவடிக்கையை தி.மு.க. அரசு எடுத்ததும், மேலும் புதுப்புது வழக்குகளை அவர்கள் மீது காவல் துறை தொடுக்க நினைப்பதும் அடக்குமுறையின் உச்சகட்டம். ஜனநாயகத்திற்கும், பத்திரிகை சுதந்திரத்திற்கும் எதிரான தி.மு.க. அரசின் இந்தச் செயலுக்கு எனது கண்டனத்தைத் தெரிவித்துக் கொள்கிறேன்.

இவ்வாறு ஜெயலலிதா தனது அறிக்கையில் தெரிவித்துள்ளார்.