சாம்பியன் லீக்: டெல்லி வெற்றி

செஞ்சுரியன்: சாம்பியன்ஸ் லீக் தொடரை டில்லி டேர்டெவில்ஸ் அணி வெற்றிகரமாக துவக்கியது. நேற்று நடந்த லீக் போட்டியில் கோல்கட்டா நைட் ரைடர்ஸ் அணியை 52 ரன்கள் வித்தியாசத்தில் வீழ்த்தியது.

தென் ஆப்ரிக்காவில் நான்காவது சாம்பியன்ஸ் லீக் "டுவென்டி-20 தொடர் நடக்கிறது. நேற்று இரவு நடந்த "ஏ பிரிவு லீக் போட்டியில் டில்லி டேர்டெவில்ஸ், நடப்பு ஐ.பி.எல்., சாம்பியன் கோல்கட்டா நைட் ரைடர்ஸ் அணிகள் மோதின. "டாஸ் வென்ற கோல்கட்டா கேப்டன் காம்பிர், "பீல்டிங் தேர்வு செய்தார்.

நல்ல துவக்கம்:
டில்லி அணிக்கு கேப்டன் ஜெயவர்தனா, சேவக் இணைந்து நல்ல அடித்தளம் அமைத்தனர். இருவரும், பாலாஜி ஓவரில் தலா ஒரு பவுண்டரி அடித்தனர். பிரட் லீ ஓவரிலும் ஜெயவர்தனா இரண்டு பவுண்டரி அடித்தார். இதையடுத்து "சுழல் நாயகன் சுனில் நரைனை அழைத்தார் காம்பிர். இதற்கு எதிர்பார்த்த பலன் கிடைத்தது. நரைனின் முதல் பந்தில் ஜெயவர்தனா(21) போல்டானார். சங்வான் பந்தில் சேவக்(22) வெளியேறினார்.

பிஸ்லா சொதப்பல்:
தொடர்ந்து மிரட்டிய நரைன் "சுழலில் 11 ரன்கள் எடுத்த நிலையில் விக்கெட்கீப்பர் பிஸ்லா கைநழுவியதால் தப்பினார் கெவின் பீட்டர்சன். இதனை பயன்படுத்திக் கொள்ளாத அவர், பிரட் லீ "வேகத்தில் 14 ரன்களுக்கு வெளியேறினார்.

உன்முக்த் அதிரடி:
கடைசி கட்டத்தில் ராஸ் டெய்லர், உன்முக்த் சந்த் சேர்ந்து அதிரடியாக ஆடினர். இவர்கள், பாலாஜி வீசிய போட்டியின் 17வது ஓவரில் 30 ரன்கள் எடுத்தனர். டெய்லர் 36 ரன்களுக்கு அவுட்டானார். அடுத்த ஓவரை அருமையாக வீசிய நரைன் ஒரு ரன் மட்டும் கொடுத்து, உன்முக்த்(40), நமன் ஓஜா(0) ஆகிய 2 விக்கெட்டுகளை சாய்த்தார். அகார்கர் 8 ரன்கள் எடுத்தார். டில்லி அணி 20 ஓவரில் 8 விக்கெட்டுக்கு 160 ரன்கள் எடுத்தது. இர்பான்(7) அவுட்டாகாமல் இருந்தார்.
கோல்கட்டா சார்பில் நரைன் 3 விக்கெட் வீழ்த்தினார்.

இர்பான் மிரட்டல்:
சவாலான இலக்கை விரட்டிய கோல்கட்டா அணியின் "டாப்-ஆர்டர் பேட்ஸ்மேன்கள் சொதப்பினர். இர்பான் பதான் வீசிய முதல் ஓவரிலேயே இரட்டை "அடி கொடுத்தார். 3வது பந்தில் காம்பிரை(0) அவுட்டாக்கினார். 6வது பந்தில் பிஸ்லாவை(1) வெளியேற்றினார். மார்னே மார்கலின் அடுத்த ஓவரில் "ஆபத்தான பிரண்டன் மெக்கலம் "டக் அவுட்டாக, 1.1 ஓவரில் 3 விக்கெட்டுக்கு 3 ரன்கள் எடுத்து தத்தளித்தது. தொடர்ந்து மார்னே மார்கல் பந்தில் காயமடைந்த காலிஸ்(0), "ரிட்டையர்ட் ஹர்ட் முறையில் பெவிலியன் திரும்பினார். சிறிது நேரத்தில் உமேஷ் யாதவ் "வேகத்தில் யூசுப் பதான்
(11) "போல்டாக, நிலைமை மோசமானது.
பின் மனோஜ் திவாரி(33), பாட்யா(22) இணைந்து சற்று போராடினர். பிரட் லீ(13) ஏமாற்ற, கோல்கட்டா அணி 20 ஓவரில் 7 விக்கெட்டுக்கு 108 ரன்கள் மட்டும் எடுத்து தோல்வி அடைந்தது.
ஆட்ட நாயகன் விருதை இர்பான் பதான் வென்றார்.


பாவம் பாலாஜி
கோல்கட்டா அணியின் பாலாஜி வீசிய போட்டியின் 17வது ஓவரில் ராஸ் டெய்லர் ஒரு சிக்சர், பவுண்டரி அடித்தார். சந்த் தன்பங்கிற்கு 2 பவுண்டரி, ஒரு சிக்சர் அடிக்க, இந்த ஓவரில் மட்டும் மொத்தம் 30 ரன்கள் எடுக்கப்பட்டன. இதையடுத்து சாம்பியன்ஸ் லீக் வரலாற்றில் 4 ஓவரில் அதிக ரன்(61) விட்டுக் கொடுத்த பவுலர்கள் வரிசையில் பாலாஜி இரண்டாவது இடத்தை பெற்றார். முதலிடத்தில் பெங்களூரு அணியின் ஸ்ரீநாத் அரவிந்த்( 69 ரன், எதிர், தெற்கு ஆஸ்திரேலியா, 2011) உள்ளார்.


காலிஸ் காயம்
பந்துகள் எகிறும் ஆடுகளத்தில் டில்லி "வேகப்புயல்கள் போட்டுத்தாக்க, கோல்கட்டா வீரர்கள் பெரிதும் அவதிப்பட்டனர். மார்னே மார்கல் வீசிய பந்து அனுபவ காலிஸ் விரலை தாக்க, ரத்தம் கொட்டியது. இதையடுத்து இவர் "ரிட்டையர்ட் ஹர்ட் முறையில் பெவிலியன் திரும்பினார். பின் "பேட் செய்ய வரவில்லை. இவருக்கு "எக்ஸ்-ரே எடுத்து பார்க்கப்பட்டது. இதே ஓவரில் யூசுப் கையிலும் பந்து தாக்கியது. அகார்கர் வீசிய பந்து, பாட்யாவின் விலா எலும்பு பகுதியை தாக்கியது.

தினமலர்

இருந்தாலும் சேவக் அடிக்கவில்லையே அதனால மேட்ச் பாக்கவே முடியல

இல்லைனாலும் பாக்கமுடியாது ஏனா மின்சாரம் தான் இல்லையே அப்பறம் எங்க பாக்குறது

பகிர்வுக்கு நன்றி அண்ணா