பேருந்து படிக்கட்டுகளிலும் கதவு: உயர்நீதிமன்றத்தில் வழக்கு

சென்னை, சென்னை உயர்நீதிமன்றத்தில், நேதாஜி போக்குவரத்து தொழிலாளர்கள் பாதுகாப்பு சங்கத்தின் தலைவர் அன்புராஜ் பொது நல வழக்கு தொடர்ந்துள்ளார்.

அதில் கூறியிருப்பதாவது:-

எங்கள் சங்கத்தை சேர்ந்த பஸ் கண்டக்டர் வேலுசாமி கோவை போக்குவரத்து கழகத்தில் பணியாற்றுகிறார். கடந்த அக்டோ பர் மாதம் உக்கடத்தில் இருந்து கொம்பை காட்டுப்புத்தூருக்கு சென்ற பஸ்சில் அவர் பணியாற்றிய போது கூட்ட நெரிசல் காரணமாக தவறி படிக்கட்டு வழியே கீழே விழுந்தார். இதனால் காயமடைந்த அவர் மருத்துவமனையில் சிகிச்சை பெற்று வருகிறார்.

தமிழகத்தில் இது போன்ற கண்டக்டர்களும், பயணிகளும் பஸ் படிகட்டு வழியே கீழே விழும் சம்பவங்கள் நிறைய நடக்கின்றன. இதனால் பாதிக்கப்படுவோருக்கு அரசு நஷ்டஈடு வழங்கி வருகிறது.

இந்நிலையில் பஸ் கண்டக்டர்களுக்கும், பயணிகளுக்கும் விபத்து ஏற்படுவதை தடுக்கும் வகையில் அனைத்து அரசு மற்றும் தனியார் பஸ்களின் படிக்கட்டுகளில் தானியங்கி கதவுகள் பொருத்தி பராமரிக்க ஐகோர்ட்டு உத்தரவிட வேண்டும்.

இதன் மூலம் பஸ் படி கட்டில் பயணம் செய்து ஏற்படும் விபத்துகளை தவிர்க்க முடியும் என்று கூறியிருந்தார்.

தலைமை நீதிபதி இக்பால், நீதிபதி சிவஞானம் ஆகியோர் முன்பு இந்த மனு இன்று (ஆக.20) விசாரணைக்கு வந்தது. அப்போது அரசு தரப்பில், 4 வாரத்தில் உரிய பதில் மனு தாக்கல் செய்யுமாறு நீதிபதிகள் உத்தரவிட்டனர். மனுதாரர் சார்பில் வக்கீல் ஜார்ஜ் வில்லியம் ஆஜரானார்

நல்ல விடயம்!