கத்திப்பாராவில் தூண்களின்றி அமைகிறது மேம்பாலம்!

சென்னை: கோயம்பேடு - பரங்கிமலை இடையே, 12 கி.மீ., தூரம் மெட்ரோ ரயில் பாதை அமைக்கும் பணியில், 11 கி.மீ., தூரம் பாதை அமைக்கப்பட்டுவிட்டது. கத்திப்பாரா அருகே, ஜி.எஸ்.டி., சாலை, 100 அடி சாலை இடையே, தூண்களின்றி, 75 மீ., நீளத்திற்கு, மேம்பாலம் அமைக்கும் பணி துவங்கியது.

சென்னை மெட்ரோ ரயில் திட்டத்தில் முதல் கட்டமாக, கோயம்பேடு - பரங்கிமலை இடையே, வரும், 2014, ஜனவரியில், ரயில் போக்குவரத்து துவங்கப்பட உள்ளது. இதற்காக, இப்பகுதிகளுக்கு இடையே, மெட்ரோ ரயில் பாதை பணி விரைவாக நடந்து வருகிறது. இந்த திட்டத்தில், கோயம்பேடு - பரங்கிமலை இடையே, 12 கி.மீ., தூரம், சிமென்ட் தூண்கள் மீது பாலம் அமைக்கப்பட்டு, அதன் மீது, ரயில் பாதை அமைக்கப்பட வேண்டும். இதில், தற்போது வரை, 11 ஆயிரத்து, 250 மீ., தூரம் பாலப் பணி முடிந்துள்ளது. மீதமுள்ள, 750 மீ., தூரம் பாலம் அமைக்கப்படுவதற்காக, சிமென்ட் தூண்கள் அமைக்கும் பணியில், இன்னும் மூன்று தூண்கள் மட்டுமே கட்டப்பட வேண்டி உள்ளது. மற்ற தூண்களுக்கு இடையே, "செக்மென்ட்'கள் இணைப்பு மூலம், பாலம் அமைக்கும் பணி நடந்து வருகிறது.

12 கி.மீ., தூரம் தண்டவாளம்:


இப்பாதையில், கோயம்பேடு - வடபழனி - அசோக்பில்லர் இடையே, தண்டவாளம் அமைக்கும் பணியில் இதுவரை, இருவழி மார்க்கத்திலும், 12 கி.மீ., தூரம் வரை, தண்டவாளம் அமைக்கும் பணி முடிந்துள்ளது. இப்பாதையில், சிட்கோ - ஆலந்தூர் ரயில் நிலையம் இடையே, 500 மீ., தூரமும், ஆலந்தூர் - பரங்கிமலை இடையே, 250 மீ., தூரம் என, 750 மீ., தூரம், சிமென்ட் தூண்களின் மீது பாலம் அமைக்கும் பணி மீதம் உள்ளது. இப்பணிகள், செப்டம்பருக்குள் முடிக்க, திட்டமிடப்பட்டு உள்ளது. இப்பாதையில், கோயம்பேடு, கோயம்பேடு பேருந்து நிலையம், அரும்பாக்கம், வடபழனி, அசோக் நகர் - கே.கே., நகர், சிட்கோ, ஆலந்தூர், பரங்கிமலை ரயில் நிலைய பணிகள், 70 சதவீதம் பணி முடிக்கப்பட்டு உள்ளது என, அதிகாரிகள் தெரிவித்தனர்.

75 மீ., நீள மேம்பாலம்:


மெட்ரோ ரயில் திட்ட பணியில், கோயம்பேடு - பரங்கிமலை இடையே, சிமென்ட் தூண்கள் இடையே, இடவசதிக்கு ஏற்ப, 31 மீ., நீளம் முதல், 12 மீ., நீளம் வரை, தொடர் மேம்பாலம் அமைக்கப்பட்டு, அதன் மீது, ரயில் தண்டவாளம் அமைக்கப்பட்டு வருகிறது. இப்பாதையில், ஆலந்தூர் ரயில் நிலையம் அருகில், ஜி.எஸ்.டி., சாலை மற்றும் கத்திப்பாரா மேம்பாலத்தில் வாகன போக்குவரத்திற்கு இடையூறு இன்றி, பாலம் அமைக்க வேண்டிய நிலை ஏற்பட்டதால், கத்திப்பாரா பாலம் - ஆலந்தூர் மெட்ரோ ரயில் நிலையம் இடையே, தூண்கள் இன்றி, "கேன்டி லீவர்' தொழில்நுட்பத்தில், 75 மீ., நீளத்திற்கு மேம்பாலம் கட்டப்படுகிறது. இதில், இரண்டு தூண்களுக்கும் இடையே, 3 மீட்டர் நீளமும், கீழ் பகுதி தேவையான அளவு வளைவுடனும் வடிவமைக்கப்பட்டு, தயாரிக்கப்பட்டு உள்ள, 12 ஜோடி, "செக்மென்ட்'களும் (மொத்தம், 24 செக்மென்டுகள்), இத்துடன், பாலத்தின் மையப்பகுதிகளை இணைக்கும் வகையில், 3 மீ., நீளத்தில் செவ்வக வடிவில் தயாரிக்கப்பட்டுள்ள ஒரு செக்மென்ட் என, 25 செக்மென்டுகள் இணைக்கப்பட்டு, இப்பாலம் கட்டப்படுகிறது. இந்த பணி துவங்கப்பட்டு, இரண்டு தூண்களுக்கு இடையே, தலா, 3 மீ., நீளத்தில், இரண்டு செக்மென்டுகளை இணைக்கும் பணி, நடந்து வருகிறது. முழுப்பணியும், வரும் ஆகஸ்ட் மாதத்திற்குள்ளாக முடிக்கப்படும். கோயம்பேடு - பரங்கிமலை இடையே, 12 கி.மீ., ரயில் பாதை மற்றும் நிலையங்கள் அமைக்கும் பணி, வரும் அக்டோபருக்குள் முடிக்கப்பட்டு, டிசம்பரில் மெட்ரோ ரயில் சோதனை ஓட்டம் நடத்தவும், இப்பாதையில், வரும், 2014, ஜனவரியில், பயணிகள் ரயில் போக்குவரத்து துவக்கவும் திட்டப் பணிகள் விரைவாக முடிக்கப்பட உள்ளன.

நன்றி : தினமலர்

கத்திப்பாரா பாலம் - ஆலந்தூர் மெட்ரோ ரயில் நிலையம் இடையே, தூண்கள் இன்றி, "கேன்டி லீவர்' தொழில்நுட்பத்தில், 75 மீ., நீளத்திற்கு மேம்பாலம் கட்டப்படுகிறது.

அம்மாடியோ.... பாலம் கீழே விழாம இருந்தா சரிதான்...