தப்பு செய்தால் உயிரை குடிக்கும் பாம்புத் தாய் :ஆண்கள் மட்டுமே வழிபடும் வினோதம்

சேலம் மாவட்டம் மல்லியக்கரையில் இருந்து 10 கி.மீ. தொலைவில் உள்ளது மேல்தொம்பை. வனத்துறை கட்டுப்பாட்டில் உள்ள கிராமம். ‘வனத்துறை அனுமதியின்றி பாம்புத் தாய் கோயிலுக்கு சென்றால் தண்டிக்கப்படுவீர்கள்’ என்ற மிரட்டலுடன் வரவேற்கிறது ஊர் எல்லையில் இருக்கும் போர்டு. இதை கடந்து, அடர்ந்த வனப்பகுதியின் கரடு முரடான பாதையில் நடந்து சென்றால் தண்ணீர் தேங்கிய குட்டை. அதன் அருகே குதிரை சிலைகளுடன் தொட்டிச்சி அம்மன், நூற்றுக்கும் அதிகமான வேல்களுடன் கருப்பசாமி கம்பீரமாக காட்சி அளிக்கின்றனர். இந்த தெய்வங்களைத்தான் ‘பாம்புத் தாயம்மன்’ என்று ஒரே பெயரில் பயபக்தியுடன் வழிபட்டு வருகின்றனர் மக்கள்.
பாம்புத் தாயம்மன் இருக்கும் பகுதி முழுவதும் ஆண்களை மட்டுமே காண முடிகிறது. ஏன், பெண்கள் இங்கு வருவதில்லையா? பாம்புத் தாயம்மன் வழிபாடு பற்றி ஊர் பெரியவர் காவேரி, முனியன் ஆகியோர் சொல்லத் தொடங்குகின்றனர்...
‘‘பல நூறு வருஷம் முன்னாடி காவல் தெய்வமான கருப்பசாமியை நெனச்சு கடுமையா தவம் செஞ்ச ஒருத்தரு ஜீவசமாதி அடைஞ்சிட்டாரு. சில வருஷம் கழிச்சு, ஊர் முக்கியஸ்தர்களோட கனவுல வந்தாரு. எல்லைப் பகுதியில நம்ம குலதெய்வமான தொட்டிச்சி அம்மனையும் காவல்தெய்வமான கருப்பசாமியையும் ‘பாம்புத் தாய்’னு அழைச்சி கும்பிட்டா ஊருக்குள்ள தீய சக்திகள் வராதுனு சொல்லிட்டு மறைஞ்சு போய்ட்டாரு.
பாம்புனா படையும் நடுங்கும்பாங்க. பாம்புத் தாயம்மன் பேரை சொன்னா திருட்டுப் பசங்களும் தப்பு செய்றவங்களும் தலைதெறிக்க ஓடுவானுங்க. இந்த அம்மன் சத்தியத்துக்கும் தர்மத்துக்கும் கட்டுப்பட்டது. இந்த சாமிக்கு தீட்டு ஆகாதுங்கறதால 200 வருஷமா ஆம்பிளைங்க மட்டும்தான் பூஜை செய்து, படையல் போட்டு நேர்த்திக்கடன் செலுத்துறாங்க.
யாராச்சும் தப்பு செய்தா பாம்புத் தாயம்மன் உடனே அவங்க உசிரை எடுத்துடும்கிறது எங்க நம்பிக்கை. தப்பு செய்யும் யாரும் பாம்புத் தாயி பக்கம் வரமாட்டாங்க. அம்மன் பேரை உச்சரிக்கவும் மாட்டாங்க. திருடுறவங்க, அடுத்தவங்க சொத்த ஏமாத்துறவங்கள பாம்புத் தாய் சும்மா விடாது. அவங்களுக்கு உடனே தண்டனை கொடுத்துடுவா. பொருளையும், சொத்தையும் பறிகொடுத்தவங்க, அதை எடுத்தவங்களை நினைச்சுக்கிட்டே பாம்புத் தாய் முன்னாடி வேலை தலைகீழா பூமியில குத்தினா, ஏமாத்துனவங்க உயிரை ஆத்தா கொஞ்ச காலத்திலயே எடுத்துடுவா.
பாம்புத் தாய்க்கு ஞாயிறு, செவ்வாய் விசேஷம். பக்தர்கள் கிடா வெட்டி, ரத்தசோறு படையலிட்டு வேண்டுதலை நிறைவேத்துவாங்க. தீட்டோட யாரும் போனா கருப்பசாமி அடிச்சிடும். பாம்புத் தாய்க்கு கிடாவை பலியிடும் ஆம்பிளைங்க அதை அங்கயே சமைச்சு சாப்பிடுவாங்க. படையல் போட்ட கறியை ஊருக்குள்ள எடுத்து வரக்கூடாது. அந்த கறியைக்கூட பொம்பளைங்க சாப்பிடறதில்ல’’ என்கின்றனர் ஊர் மக்கள்.
“150 வருஷமா மலைகிராம மக்களின் குலதெய்வமாக பாம்புத் தாய் விளங்குது. தம்மப்பட்டி, மல்லியகரை, சேலம், தர்மபுரி, நாமக்கல்னு பல ஊர்லேந்தும் வர்றாங்க. சாமிகிட்ட குறைகளை சொல்றாங்க. அதை நிறைவேத்துனா ரத்தக் காவு கொடுக்கிறதா வேண்டிக்கிட்டு, நேர்த்திக் கடனை பயபக்தியோட செலுத்துறாங்க. தப்பு செய்றவங்களை பாம்புத் தாயி விடமாட்டா. ஆனா, நல்லவங்களுக்கு ரொம்ப துணையா இருப்பா. பக்தியோட எது வேண்டுனாலும் உடனே நிறைவேத்தி வச்சுடுவா. முக்காவு (ஆடு, பன்றி, கோழி) கொடுத்து சாமிக்கு வேண்டுதலை நிறைவேத்துறது இங்க வழக்கம்’’ என்கிறார் பூசாரி லட்சுமணன்.