மேலும் 9 ரயில் நிலையங்களில் இலவச ‘வை – பை’ வசதி

புதுடில்லி :
புவனேஸ்வர் ரயில் நிலையதில், இலவச ‘வை – பை’ வசதி,
நாளை தொடங்கப்படுகிறது.’டிஜிட்டல்’ இந்தியா திட்டத்தின்
கீழ், முக்கியமான ரயில் நிலையங்களில், பயணிகளுக்கு
இன்டர்நெட் வசதி வழங்க, ரயில்வே முடிவு செய்துள்ளது.

இந்தப் பணி, ரயில்வேயின் பொதுத்துறை நிறுவனமான,
‘ரயில்டெல்’லிடம் ஒப்படைக்கப் பட்டுள்ளது.

கூகுள் நிறுவனத்துடன் இணைந்து, ரயில் நிலையங்களில்,
இலவசமாக, ‘வை – பை’ வசதி வழங்கும் பணியை,
‘ரயில்டெல்’ செய்து வருகிறது. மும்பை சென்ட்ரல் ரயில்
நிலையத்தில் தான், முதன்முறையாக, பயணிகளுக்கு
இலவசமாக ‘வை – பை’ வசதி வழங்கப்பட்டது.

இதையடுத்து, இரண்டாவது ரயில் நிலையமாக, ஒடிசா
தலைநகர் புவனேஸ்வர் ரயில் நிலையத்தில், இலவச
‘வை – பை’ வசதி, நாளை தொடங்கப்படுகிறது.

ஸ்மார்ட் போன் வைத்திருக்கும் அனைவரும், இந்த
வசதியை பயன்படுத்தி கொள்ள முடியும். இதுபற்றி
ரயில்வே அதிகாரி ஒருவர் கூறியதாவது:

நாடு முழுவதும், 400க்கும் அதிகமான ரயில் நிலையங்களில்,
‘வை – பை’ வசதி செய்து தர முடிவு செய்யப்பட்டுள்ளது.
ஜெய்ப்பூர், பாட்னா, ராஞ்சி, எர்ணாகுளம், அலஹாபாத்,
லக்னோ உட்பட, 10க்கும் அதிகமான ரயில் நிலையங்களில்,
‘வை – பை’ வசதி வழங்குவதற்கான சோதனை நடந்து
வருகிறது.

விரைவில், இந்த ரயில் நிலையங்களில், ‘வை-பை’ வசதி
முழுமையாக தொடங்கப்படும். இந்த ஆண்டு இறுதிக்குள்,
100 ரயில் நிலையங்களில், ‘வை – பை’ வசதி செய்து தரவும்,
ரயிலவே திட்டமிட்டுள்ளது. இவ்வாறு ரயில்வே அதிகாரி
கூறினார்.
–
——————————
தினமலர்