இந்தியாவில் முதல்முறையாக கழிவுநீரை குடிநீராக்கும் திட்டம்

இந்தியாவில் முதல் முறையாக கழிவுநீரை
குடிநீராக்க பெங்களூரு குடிநீர் வடிகால் வாரியம்
திட்டம் வகுத்துள்ளது.

கர்நாடகத்தில் கடுமையான வறட்சி ஏற்பட்டுள்ளதால்,
பெரும்பாலான கிராமங்களில் குடிநீர் பஞ்சம்
ஏற்பட்டுள்ளது. குடிநீரில்லாமல் தவிக்கும் கிராம
மக்கள் சுத்தமில்லாத, கலங்கலான தண்ணீர் குடிக்கும்
நிலைக்கு தள்ளப்பட்டுள்ளனர்.

இந் நிலையில், இந்தியாவில் முதல் முறையாக
கழிவுநீரை குடிநீராக்க பெங்களூரு குடிநீர் வடிகால்
வாரியம்(பி.டபிள்யூ.எஸ்.எஸ்.பி.) திட்டம் வகுத்துள்ளது.
கழிவுநீரை குடிநீராக்கும் திட்டத்தை நமீபியா, இஸ்ரேல்,
சிங்கப்பூர் போன்ற நாடுகள் வெற்றிகரமாக செயல்படுத்தி
வருகின்றன.

இதை பின்பற்றி, பெங்களூரிலும் கழிவுநீரை குடிநீராக்க
திட்டமிடப்பட்டுள்ளது.

இதற்காக பெங்களூரு மைசூரு சாலையில் அதிநவீன
கழிவுநீர் சுத்திகரிப்பு நிலையம் அமைக்க வாரியம்
திட்டமிட்டுள்ளது. இந்த நிலையத்தில் தினமும்
10 லட்சம் லிட்டர் கழிவுநீர் குடிநீராக மாற்றப்பட
இருக்கிறது.

2004-ஆம் ஆண்டு முதல் விருஷபாவதி கால்வாய்
பகுதியில் செயல்பட்டு வரும் தினமும் 6 கோடி லிட்டர்
தண்ணீர் சுத்திகரிப்பு நிலையத்தையும் இந்த திட்டத்துக்கு
பயன்படுத்த திட்டம் வகுக்கப்பட்டுள்ளது.

கழிவுநீரை குடிநீராக்கும் சுத்திகரிப்பு நிலையத்தின்
உள்கட்டமைப்பு வசதிகளை ஏற்படுத்த ரூ.4.5 கோடி
செலவாகும் என மதிப்பிடப்பட்டுள்ளது. கழிவுநீரை
சுத்திகரித்த பிறகு, அதை குடிநீராக பருகும் பக்குவத்துக்கு
மக்கள் வந்துவிட்டால், அதிக எண்ணிக்கையிலான சுத்தி
கரிப்பு நிலையங்கள் அமைக்கப்படும் என வாரியத்தின்
உயரதிகாரி ஒருவர் தெரிவித்தார்.

அரசு அலுவலகங்களில் சுத்திகரிக்கப்பட்ட கழிவுநீரை
குடிநீராக பருக ஊக்குவிக்கப்படும். மேலும் இந்த நீரை
சிறிய உறைகள் அல்லது குவளைகளில் அடைத்து
ஒரு லிட்டருக்கு ரூ.2 அல்லது ரூ.3 விலையில் விற்கவும்
வாரியம் திட்டமிட்டுள்ளது.

உலக அளவில் கழிவுநீரை குடிநீராக்கி பருகுவதில்
முதலிடம் வகிக்கும் நமீபியா, பாட்டில்களில் அடைத்து
குடிநீரை விநியோகிக்கிறது.

சிங்கப்பூர் நாட்டில் 7 சதவீத சுத்திகரிக்கப்பட்ட கழிவுநீர்
நல்ல நீருடன் கலந்து விநியோகிக்கப்படுகிறது.

இஸ்ரேல் நாட்டில் இது 30 சதவீத சுத்திகரிக்கப்பட்ட
கழிவுநீர் நல்ல நீருடன் கலக்கப்படுகிறது என வாரியத்தின்
உயரதிகாரி ஒருவர் தெரிவித்தார்.
-
----------------------------------

தினமணி