வேட்புமனு தாக்கல் செய்ய நாளை கடைசி நாள்: இதுவரை 2,100-க்கும் மேல் மனுக்கள் அளிப்பு

by rammalar Thu Apr 28, 2016 2:02 pm

தமிழக சட்டப் பேரவைத் தேர்தலில் வேட்பு மனு
தாக்கல் செய்ய கடைசி நாள் வெள்ளிக்கிழமையாகும்

(ஏப். 29). தமிழகத்தில் புதன்கிழமை நிலவரப்படி
பேரவைத் தேர்தலில் போட்டியிட 2,100-க்கும் மேற்பட்ட
மனுக்கள் அளிக்கப்பட்டுள்ளன.

ஒரே வேட்பாளரே இரண்டு, மூன்று மனுக்களையும்,
ஒரு வேட்பாளருக்கு மாற்றாக மற்றொரு வேட்பாளரும்
மனுக்களை அளித்துள்ளனர்.

தமிழக சட்டப் பேரவைத் தேர்தலில் போட்டியிடுவதற்கான
வேட்புமனு தாக்கல் கடந்த 22-ஆம் தேதி தொடங்கியது.
முதல் இரண்டு நாள்களில் சேர்த்து 861 பேரும், மூன்றாம்
நாளான செவ்வாய்க்கிழமை (ஏப். 26) 191 பேரும் மனு தாக்கல்
செய்தனர்.

புதன்கிழமை வரையில் மொத்தமாக 2 ஆயிரத்து 112 மனுக்கள்
அளிக்கப்பட்டுள்ளன.

நாளை கடைசி: சட்டப் பேரவைத் தேர்தலில் போட்டியிட
வேட்புமனு தாக்கல் செய்ய வெள்ளிக்கிழமை கடைசி நாளாகும்.
வியாழக்கிழமையன்று அதிமுகவைச் சேர்ந்த 233 வேட்பாளர்களும்
மனுக்களை தாக்கல் செய்யவுள்ளனர்.

இதனால், வேட்புமனுக்களின் எண்ணிக்கை மேலும் அதிகரிக்கும்
என்று எதிர்பார்க்கப்படுகிறது.

வேட்புமனுக்கள் மீதான பரிசீலனை ஏப்ரல் 30-ஆம் தேதி
நடைபெறுகிறது. வேட்புமனுக்களை வாபஸ் பெற மே 2-ஆம்
தேதி கடைசியாகும். அன்றைய தினம் இறுதி வேட்பாளர் பட்டியல்
வெளியிடப்படும்.
–
——————————
தினமணி