ஆக்கிரமிப்பு காஷ்மீர் இந்தியாவுக்கே சொந்தம் : சுஷ்மா

புதுடில்லி : பாகிஸ்தான் ஆக்ரமிப்பு காஷ்மீர் இந்தியாவுக்கே சொந்தமானது என மத்திய வெளியுறவுத்துறை அமைச்சர் சுஷ்மா சுவராஜ் தெரிவித்துள்ளார்.


இந்தியாவுக்கே சொந்தம் :

லோக்சபாவில் நேற்று நடந்த விவாதத்தின் போது ஆக்கிரமிப்பு காஷ்மீர் தொடர்பான கேள்விக்கு சுஷ்மா பதிலளித்தார். அப்போது பேசிய அவர், ஆக்ரமிப்பு காஷ்மீரின் கில்ஜித்-பல்திஸ்தான் பகுதிகளை தனது நாட்டின் 5வது மாகாணமாக அறிவிக்க பாகிஸ்தான் அரசு நடவடிக்கை எடுத்துவருவது கண்டனத்திற்கு உரியது.

அப்பகுதி உள்பட ஜம்மு காஷ்மீர் முழுவதும் இந்தியாவுக்கே சொந்தம். இதற்கு பாகிஸ்தான் உரிமை கொண்டாட வேண்டாம்.

பிரிவினையின் போது இந்தியாவின் ஒருங்கிணைந்த பகுதியாக கில்ஜித்-பல்திஸ்தான் இருந்த போதும் பிரிட்டன் ஏஜன்ட்டாக பொறுப்பில் இருந்த அதிகாரிகள் பாகிஸ்தான் ராணுவம் அப்பகுதியில் இருப்பதற்கு அனுமதியளித்தது.

அதன் காரணமாக 1947 முதலே பாகிஸ்தான் அப்பகுதியை ஆக்ரமித்துள்ளது. இவ்வாறு சுஷ்மா தெரிவித்தார்.
-
தினமலர்