ரூ.250 கோடி மதிப்பிலான 80 ஏக்கர் ஆக்கிரமிப்பு நிலம் மீட்பு

by rammalar Sun May 07, 2017 12:51 pm

பெங்களூரு,

சட்ட விரோதமாக அபகரித்திருந்த, அரசுக்கு சொந்தமான,
250 கோடி ரூபாய் மதிப்பிலான, 80 ஏக்கர் நிலம் மீட்கப்பட்டது.

பெங்களூரு தெற்கு தாலுகாவில் அரசுக்கு சொந்தமான நிலம்,
ஏரிக்கரைகளை, ஆக்கிரமிப்பு செய்தவர்களுக்கு, 'நோட்டீஸ்'
அனுப்பி, நிலத்தை ஒப்படைக்க அறிவுறுத்தப்பட்டது.

ஒப்படைக்க தவறியதால், மாவட்ட கலெக்டர், வி.சங்கர்
தலைமையில், அதிகாரிகள் நேற்று அதிரடி நடவடிக்கை
மேற்கொண்டனர்.

● உத்ரஹள்ளி பேரூராட்சிக்கு உட்பட்ட கொள்ளஹட்டி
கிராமத்தில், 24 ஏக்கர் அரசு தரிசு நிலத்தை ஆக்கிரமித்திருந்த
முனிராஜ் உட்பட சிலரிடமிருந்து மீட்டனர்.
'அரசுக்கு சொந்தமான இடம்' என, அறிவிப்பு பலகை
வைத்தனர்.

● தாவரகரே பேரூராட்சிக்கு உட்பட்ட சோழநாயக்கனஹள்ளியில்,
அரசு நிலத்தை சந்திரப்பா உட்பட ஒன்பது பேர், ஆக்கிரமிப்பு
செய்திருந்தனர். கொட்டகைகளை அகற்றி, அரசு அதிகாரிகள்
நிலத்தை மீட்டனர்.

● பேகூர் பேரூராட்சிக்கு உட்பட்ட விட்ல சந்திராவில்,
முனிரெட்டி என்பவர் ஆக்கிரமிப்பு செய்திருந்த, 10.33 ஏக்கர்
தரிசு நிலத்தை அரசு அதிகாரிகள் கையகப்படுத்தினர்.

● பீமன குப்பா கிராமத்தில், 10 ஏக்கர் தரிசு நிலத்தில்,
சிலர் குடிசைகள் அமைத்து ஆக்கிரமித்து தைல மரக்கன்றுகளை
பயிரிட்டிருந்தனர். நிலத்தை அதிகாரிகள் கையகப்படுத்தினர்.

அதிகாரிகள் நடத்திய அதிரடி நடவடிக்கையில், 80 ஏக்கர்
அரசு நிலம் மீட்கப்பட்டது; இதன் மதிப்பு, 250 கோடி ரூபாய்
என, தெரிய வந்துள்ளது.
-
---------------------------------
தினமலர்