வனப்பகுதியில் தங்கப் புதையல்: 744 தங்க நாணயங்கள் மீட்பு

வனப்பகுதியில் தங்கப் புதையல்: 744 தங்க நாணயங்கள் மீட்பு


First Published : 26 Jul 2010 02:42:56 AM IST

Last Updated : 26 Jul 2010 02:44:27 AM IST
ஈரோடு, ஜூலை 25: ஈரோடு மாவட்டம், சத்தியமங்கலம் வனப்பகுதியில் தங்கப்புதையல் கண்டுபிடிக்கப்பட்டு, 744 தங்க நாணயங்கள் மீட்கப்பட்டன.
சத்தி வட்டம், திங்களூர் அருகிலுள்ள வனப்பகுதியில் மஜ்ரா கோட்டமாளம் என்ற கிராமத்தைச் சேர்ந்தவர் வீரன்; இவரது மனைவி மாதி; கூலித் தொழிலாளிகள். இவர்களது வீட்டின் அருகே விளையாடிக் கொண்டிருந்த குழந்தைகள், மண்ணைத் தோண்டிய போது வட்ட வடிவிலான மண் சட்டி புதைந்திருந்தது தெரியவந்தது.அதை வெளியில் எடுத்துப் பார்த்தபோது, சிறிய தங்கக்காசுகள் இருந்துள்ளன. தகவலறிந்து திரண்ட அக்கம்பக்கத்தினர், ஆளுக்கு சில நாணயங்களை எடுத்துச் சென்று விட்டனர். தகவலறிந்த வட்டாட்சியர் உள்ளிட்ட அதிகாரிகள் மற்றும் போலீஸôர் அக்கிராமத்திற்குச் சென்று விசாரணை நடத்தினர்.
அப்பகுதியைச் சேர்ந்த மாதி, நாகம்மாள், மாதேவி, தேவி, மாதன், பையன், சீனிவாசன், கருப்புசாமி, சுரேஷ் உள்ளிட்டோரிடமிருந்து 744 தங்க நாணயங்கள் கைப்பற்றப்பட்டன. அவை ஒவ்வொன்றும் 400 மில்லிகிராம் எடை கொண்டவையாக இருந்தன.
இந்த நாணயங்கள் ஈரோடு மாவட்ட ஆட்சியர் ஆர்.சுடலைக்கண்ணனிடம் ஞாயிற்றுக்கிழமை பிற்பகல் ஒப்படைக்கப்பட்டன. அவற்றைப் பார்வையிட்ட மாவட்ட ஆட்சியர், நிருபர்களிடம் கூறியது:
இவை 18 கேரட் தங்கமாக இருக்கலாம் என்று கருதப்படுகிறது. இதன் மதிப்பு சுமார் ரூ. 5 லட்சம். இவை ஈரோடு அரசு அருங்காட்சியகத்தில் ஒப்படைக்கப்படும். பின்னர் ஆய்வுக்காக சென்னைக்கு அனுப்பப்படும்.
இந்த நாணயங்களின் இருபுறமும் குறியீடுகள் காணப்படுகின்றன. அனைத்து நாணயங்களிலும் ஒரே மாதிரியான குறியீடுகள் காணப்படுகின்றன. தொல்லியல் மற்றும் நாணயவியல் ஆய்வாளர்களைக் கொண்டு ஆய்வு செய்தால், இந்த நாணயங்கள் எந்தக் காலத்தைச் சேர்ந்தவை என்பதைத் தெரிந்து கொள்ளலாம்.
புதையல் கிடைத்த பகுதியில் வேறு ஏதேனும் வரலாற்றுச் சான்றுகளோ, தொல்பொருள்களோ இருக்கிறதா என்பது குறித்தும் ஆய்வு செய்யப்படும். தேவைப்பட்டால் அப்பகுதியில் அகழ்வாராய்ச்சி நடத்தவும் அரசுக்கு பரிந்துரை செய்யப்படும் என்றார்.