களையப்பட்ட மாணவியின் உள்ளாடை: சிபிஎஸ்இ வருத்தம்

நீட் தேர்வின் போது கேரள மாநிலத்தில் ஒரு பள்ளியில் மாணவியின் உள்ளாடை களையப்பட்டதிற்கு சிபிஎஸ்இ நிர்வாகம் வருத்தம் தெரிவித்துள்ளது.

பாதிக்கப்பட்டமாணவியிடம் அப்பள்ளி முதல்வர் மன்னிப்பு கேட்க வேண்டும் என்றும் சிபிஎஸ்இ நிர்வாகம் அறிவுறுத்தியுள்ளது.

இது தொடர்பாக விரிவான விளக்க அறிக்கையை சிபிஎஸ்இ நிர்வாகம் வெளியிட்டுள்ளது. அதில், கடந்த 2015-ஆம் ஆண்டு நடந்த அகில இந்திய மருத்துவ நுழைவுத்தேர்வின்போது மாணவர்கள் சிலர் புளூடூத் உள்ளிட்ட அதிநவீன சாதனங்களை காதிற்கு பின்னரும் உள்ளாடைகளிலும் மறைத்து வைத்து முறைகேடு செய்தனர்.

இதனால் நுழைவுத் தேர்வு ரத்து செய்யப்பட்டது. இது தொடர்பான வழக்கில் தேர்வுகளில் முறைகேடுகளை தடுக்க விரிவான செயல்திட்டத்தை உருவாக்குமாறு உச்சநீதிமன்றம் உத்தரவிட்டது. அதனைத் தொடர்ந்தே கடுமையான சோதனை விதிமுறைகள் ஏற்படுத்தப்பட்டது. இவ்விதிமுறைகளே பயன்படுத்தியே கடந்த ஆண்டு நீட்தேர்வுகள் நடத்தப்பட்டது.

இந்த ஆண்டும் சுமூகமான முறையில் தேர்வுகள் நடந்துள்ளது. இந்த விதிமுறைகளை உச்ச நீதிமன்றமே பாராட்டியுள்ளது. இவ்விதிகள் குறித்து மாணவர்களுக்குஎஸ்எம்எஸ், இ-மெயில், இணையதளம் உள்ளிட்ட வழிகளில் முன்கூட்டியே அறிவுறுத்தல் வழக்கப்பட்டிருந்தது என சிபிஎஸ்இ விளக்கம் அளித்துள்ளது.
-
புதிய தலைமுறை