ரூ.10 கோடி கேட்டு கெஜ்ரிவால் மீது மேலும் ஒரு அவதூறு வழக்கு

by rammalar Tue May 23, 2017 4:31 am

புதுடெல்லி,

தற்போது மத்திய நிதி மற்றும் ராணுவ மந்திரியாக
பதவி வகிக்கும் அருண்ஜெட்லி 2000–ம் ஆண்டு முதல்
2003–ம் ஆண்டு வரை டெல்லி மாவட்ட கிரிக்கெட்
சங்கத்தின் தலைவராக இருந்தார்.

தான் பதவி வகித்த காலத்தில் ஊழலில் அருண்ஜெட்லி
ஈடுபட்டார் என்று டெல்லி முதல்–மந்திரி கெஜ்ரிவால்
மற்றும் ஆம் ஆத்மி கட்சி தலைவர்கள் ராகவ் சதா,
குமார் விஸ்பாஸ், அசுடோஷ், சஞ்சய் சிங், தீபக் பாஜ்பாய்
ஆகியோர் குற்றம்சாட்டினர்.

இதையடுத்து அவர்கள் 6 பேர் மீதும் டெல்லி ஐகோர்ட்டில்
ரூ.10 கோடி கேட்டு அருண்ஜெட்லி சிவில் அவதூறு வழக்கு
தொடர்ந்தார்.

காரசார வாக்குவாதம்

இதன் மீதான வழக்கு விசாரணை கடந்த 15 மற்றும் 17 ஆகிய
தேதிகளில் நடந்தபோது ஐகோர்ட்டு இணை பதிவாளர் முன்பாக
அருண்ஜெட்லி ஆஜரானார். கெஜ்ரிவால் தரப்பில் ஆஜரான
மூத்த வக்கீல் ராம்ஜெத்மலானி, அவரிடம் குறுக்கு விசாரணை
நடத்தினார்.

அப்போது இருதரப்பினர் இடையேயும் காரசார வாக்குவாதம் நடந்தது.
‘‘இந்த ஊழல் பற்றி நான் எழுதிய கட்டுரையை அருண்ஜெட்லியின்
மிரட்டலால் ஒரு வாரப்பத்திரிகை வெளியிடவில்லை’’ என்று
ராம்ஜெத்மலானி குற்றம் சாட்டினார்.

அதற்கு அருண்ஜெட்லி, இதை கெஜ்ரிவால் சொல்லச் சொன்னாரா?
என்று கேட்க ராம்ஜெத்மலானியும் ஆமாம், அவர்தான் சொல்லச்
சொன்னார் என்று பதில் அளித்தார்.

ரூ.10 கோடி தரவேண்டும்

இந்தநிலையில் நிதி மந்திரி அருண்ஜெட்லி நேற்று தன் மீது கோர்ட்டில்
ஆட்சேபனைக்குரிய வார்த்தைகளை கூறியதற்காக ரூ.10 கோடி கேட்டு
மேலும் ஒரு சிவில் அவதூறு வழக்கை கெஜ்ரிவால் மற்றும் ஆம்
ஆத்மி தலைவர்கள் 5 பேர் மீது டெல்லி ஐகோர்ட்டில் நேற்று தொடர்ந்தார்.

ஏற்கனவே, டெல்லி கீழ் கோர்ட்டில் இதேபோல் கெஜ்ரிவால் உள்ளிட்ட
ஆம் ஆத்மி தலைவர்கள் 6 பேர் மீதும் தனியாக கிரிமினல் அவதூறு
வழக்கு ஒன்றையும் அருண்ஜெட்லி தொடர்ந்துள்ளார் என்பதும் நினைவு
கூரத்தக்கது.
-
------------------------------------
தினத்தந்தி