மதுவுக்கு பெண்கள் பெயர்: மஹாராஷ்டிராவில் சர்ச்சை

மும்பை:
'மது வகைகளுக்கு, பெண்களின் பெயர்களை வைக்க வேண்டும்'
என, யோசனை கூறிய, மஹாராஷ்டிர அமைச்சருக்கு, கூட்டணி
கட்சியான, சிவசேனா கண்டனம் தெரிவித்துள்ளது.

மஹாராஷ்டிராவில், முதல்வர் தேவேந்திர பட்னவிஸ் தலைமையில்,
பா.ஜ., - சிவசேனா கூட்டணி ஆட்சி நடக்கிறது. 'மது விற்பனையை
அதிகரிக்க வேண்டுமானால், அவற்றுக்கு பெண்களின் பெயர்களை
வைக்க வேண்டும்' என, பா.ஜ., மூத்த தலைவரும், அமைச்சருமான,
கிரிஷ் மகாஜன், சமீபத்தில் கூறியிருந்தார்.

இதற்கு, கூட்டணி கட்சியான, சிவசேனா கண்டனம் தெரிவித்துள்ளது.

இது குறித்து, அந்த கட்சியின் பத்திரிகையான, 'சாம்னா'வில் வெளி
வந்த கட்டுரை: மதுவால் ஏற்படும் பாதிப்புகள் குறித்து, மஹாராஷ்டிர
அரசு பிரசாரம் செய்கிறது. அதே நேரத்தில், மது விற்பனையை
அதிகரிக்கும் வகையில், அமைச்சர் பிரசாரம் செய்கிறார்.

பீஹாரில், மதுவிலக்கு அமல்படுத்தியதற்காக, அம்மாநில முதல்வர்,
நிதிஷ் குமாரை, பிரதமர் மோடி பாராட்டுகிறார். ஆனால், அவரது
கட்சியைச் சேர்ந்த, மஹாராஷ்டிர அமைச்சர், மது விற்பனையை
ஊக்குவிக்கிறார்.

இதுதவிர, பெண்களை இழிவுபடுத்தும் வகையில், அவருடைய
யோசனையும் உள்ளது. இவ்வாறு அதில் கூறப்பட்டுள்ளது.

இதற்கிடையே, தான் கூறிய கருத்துக்கு வருத்தம் தெரிவிப்பதாக,
அமைச்சர், கிரிஷ் மகாஜன் தெரிவித்து உள்ளார்.
-
------------------------------------
தினமலர்