ரயில்வே பொருட்களை திருடியதாக 11 லட்சம் பேர் கைது

புதுடில்லி:
நாடு முழுவதும் ரயில்வே பொருட்களை திருடியதாக
2016-ம் ஆண்டில் 11 லட்சம் பேர் கைது செய்யப்பட்டுள்ளனர்.

பயணிகளின் வசதிக்காக நாடு முழுவதும் பல்வேறு சிறப்பு
வசதிகளுடன் கூடிய ரயில்களை ரயில்வே நிர்வாகம் இயக்கி
வருகிறது. இருப்பினும் ரயில்களில் உள்ள பொருட்களை
திருடுவதும் அதிகரித்து வருகிறது.

கடந்த 2016-ம் ஆண்டில் மட்டும் ரயில்வே பொருட்களை
திருடியதாக நாடு முழுவதும் 11 லட்சம் பேரை ரயில்வே
போலீசார் கைது செய்துள்ளனர். இதில் மகாராஷ்டிரா
2.23 லட்சம் என்ற எண்ணிக்கையில் முதலாம் இடத்தையும்,
1.22 லட்சம் எண்ணிக்கையுடன் உ.பி ., 2-ம் இடத்தையும்
பிடித்துள்ளது.

ம.பி மாநிலத்தில் 98,594 பேரும், தமிழ்நாட்டில் 81,408 பேரும்,
குஜராத்தில் 77,047 பேர்கள் எனமுதல் 5 இடங்களை பிடித்துள்ளன.

இது குறித்த ரயில்வே அதிகாரிகள் கூறி இருப்பதாவது:
பிரிமீயம் குவாலிட்டி கொண்ட இரும்பு மற்றும் தாமிரம்
அடங்கிய பொருட்களே திருடர்களின் இலக்காக உள்ளது.

மேலும் ஏசி கோச்களில் பயன்படுத்தபடும் டவல்கள்,
போர்வைகள், மின்சார விளக்குகள், பேன்கள் உள்ளிட்டவையும்
திருடி செல்கின்றனர்.

எலக்ட்ரிக் ரயில்களில் மின்சாரத்தை தடைசெய்து அதன்
வயர்களை திருடிச் செல்வதன் மூலம் வெளி மார்க்கெட்டுகளில்
நல்ல விலைக்கு விற்றுவிடுகின்றனர். சமீபகாலத்தில் தேஜாஸ்
எக்ஸ் பிரஸ் மற்றும் மகாமானா எக்ஸ் பிரஸ்
ரயில்களில் இருந்து தரை விரிப்புகள் திருடுபோயுள்ளதாக
தெரிய வந்துள்ளது.

மேலும் திருட்டு சம்பவங்களை குறைக்கும் வகையில் ரயில்வே
சக்கரங்களில் உபயோகிக்கப்படும் மெட்டல் பிரேக் பிளாக்கிற்கு
பதிலாக பைபர் பிளாக்கு கள் அறிமுகப்படுத்தப்பட்டுள்ளன என
கூறினார்.


தினமலர்