ந.க.துறைவன் கவிதைகள்

பார்வை

பாதையில்
நடந்துக் கொண்டிருந்தவன்
திரும்பித்திரும்பிப் பார்த்தான்
எதற்காகத் திரும்பிப்
பார்க்கிறான் என்று
புரியவில்லை
பிறகுதான் தெரிந்தது
பின்னால் யாரோ
அழகானப் பெண் வருவது
அவன் பார்வை
மீண்டும் பின்னால்
முன்னால் இல்லை
வேகமாய் எதிரில் வந்த
மோட்டார் பைக்காரன்
“முன்னால பார்த்துப்போடா
முண்டம்
வீட்டுலே சொல்லிட்டு
வந்துட்டியா?” என்று
கத்தினான்
அப்பத்தான்
சுய நினைவுக்கு வந்தான்
வெட்கத்துடன்
வியர்த்துக்கொட்டியது
அவன் முகம்.

பிரபஞ்ச ரகசியம்

*உலகில் வாழும் மானுடத்தின்
உண்மை ரகசிய மெல்லாம்
உனக்குத் தெரியுமா?
தெரியுமென்றால்,
அது அகந்தை
தெரியாது என்றால்,
அது தன்னடக்கம்
பிரபஞ்ச ரகசியம்
உணர்வது அவசியம்!



** எது, எதை, எப்படி
எடைபோட வேண்டுமென்று
நிர்ணயித்துள்ளவன் நீ
தங்கத்தை எடைபோட
குன்றிமணியை அல்லவா
பயன்படுத்த வைத்தாய்
இப்பொழுதோ
தங்கம் விலை உயர்வானது
குன்றி மணி விலை குறைவானது!



***எது தீட்டானது?
உங்கள்
உடலா? ஆன்மாவா?
பாதையோரம் ஒதுங்கி நின்று
புலையன் கேட்டக் கேள்வி
ஆதிசங்கரரை அதிர வைத்தது
இவர்களில்
யார் ஞானி?
யார் அஞ்ஞானி?

***ஆசைகள்
அழிவதில்லை
நாமே
அழிகிறோம்

அலைகளில் அலைகழிந்து...

அஸ்தியை
கடல் நீரில் – உள்
அமுக்கியதும்
மேலெழுந்து
மிதந்து மிதந்து
முன்னும் பின்னும்
அலைகளில்
அலைகழிந்து
மெல்ல மெல்ல
கரையத் தொடங்கியது
அந்த
அஸ்தியின் வாசம்
பிடிக்காமலோ
என்னவோ
விலகி விலகி
ஓடின மீன்கள்!

---

கிராமங்களில்
அவ்வளவு
கண்டிப்புடன்
கடைபிடிக்கிறார்கள்
காலம் காலமாய்
மாலை நேரம்
விளக்கு வைச்சதும்
கைமாத்தாய்
எவருக்கும் எவரும்
கொடுப்பதில்லை
சமையல் உப்பு.

அத்துமீறும் வன்முறைகள்
ஊரெங்கும்
வெடிகுண்டு,
கலவரம், மரணம்.
பயந்து ஒதுங்கும்
மக்கள் நெரிசல்,
அத்துமீறும்
வன்முறைகள்,
அமைதியாய்
அச்சமின்றி
வேடிக்கை பார்க்கும்
உயர்கோபுரத்திலிருந்து
வெண்புறாக்கள்.

உப்பு கரித்தது உதடு
இனிக்குமென நினைத்து
முத்தமிட்டான்
உப்பு கரித்தது உதடு.

பலரும் பாராட்டினார்கள்
பாட்டியின்
நாட்டு(கை) வைத்தியம்.

எழுபது வயது முதியவர்
நகைச்சுவை எழுதி அனுப்பினார்
பரிசாக் கிடைத்தது “டீ” சர்ட்.

ஒலி எழுப்பிப் பார்த்தார் ஓட்டுநர்
அசைந்து நகரவில்லை
பாதையின் குறுக்கே எருமை.

காலையில் மார்க்கெட் போகிறது
காரில் சொகுசாய்
வளர்ப்பு நாய்க் குட்டி.

ஜல்லிக்கட்டுப் போட்டியில்
தங்கப் பதக்கம் வென்றவன்
குடும்பவாழ்க்கையில் தோல்வி.

காற்றில் மிதந்து வந்தது
மூக்கைப் பொத்தினார்கள்
தோல் கழிவுநீர் நாற்றம்.

அபாரமான பயிற்சி
குற்றவாளிகளைக் கண்டுபிடிக்கிறது
மோப்ப நாய்கள்.

“தண்ணி வண்டி” என
குழந்தைகள் கேலி செய்தனர்
போதையில் போகும் குடிகாரன்

தங்கம் விலை தெரியுமா?
தங்கத் தேரில்
பவனிவரும் சாமிக்கு.

குடிநீர் தொட்டியில் விழுந்து
தற்கொலை செய்துகொண்டது
குதித்து விளையாடிய அணில்.

மனிதர்களால் இயலவில்லை
கள்ள நோட்டைக்
கண்டுபிடிக்கிறது கருவி.

வளர்ச்சி
தெருக் கூத்துப் பர்த்து
மெய்சிலிர்த்து
பொழுதுபோக்கி வாழ்ந்தார்
என் தாத்தா

வானொலிப்
பெட்டிவாங்கி
பாட்டுக்கேட்டார்
என் அப்பா

கலர் டி.வி
பெட்டி வாங்கி
படம்பார்க்கிறேன்
நான்

மடிக்கணினி
வாங்கிப்பலதைப்
படிக்கிறான்
என் மகன்

கைபேசி
இன்டெர்நெட்டில்
உலக நடப்பை
அறிகிறான்
என் பேரன்

நாளை...
என்ன கருவி
புதியதாய் இருக்கும் -என்
கொள்ளுபேரன்

கைகளில்...

தங்கம் விலை தெரியுமா?
தங்கத் தேரில்
பவனிவரும் சாமிக்கு.

அருமையான வரிகள்..

கண்மணி சிங்

அருமையான கவிதைகள் தொடருங்கள்..

     

அருமையான கவிதைகள் தொடருங்கள்..  

வளர்ச்சி கவிதை
கால மாற்றத்தை சிறப்பாய் சொன்னது
பாராட்டுக்கள்

வரிகள் ஒவ்வொன்றும் அருயமையோ அருமை.
கவிதை பகிர்வுக்கு நன்றி ஐயா

கவிதைகள் அத்தனையும் முத்துக்கள் .பாராட்டுவதற்கு வார்த்தைகள் இல்லை

கருத்துரைத்தமைக்கு நன்றி

அருமையான கவிதைகள் தொடருங்கள்..

நன்றி

     

மிக அருமையான கவிதை
பகிர்வுக்கு நன்றி