சீக்கிரமே மின்சார உற்பத்தி அதிகரிக்கும்

சென்னிமலை: குறைந்த அளவு காற்று வீசினாலும், அதிகளவில் மின்சாரம் உற்பத்தி செய்யும் புதிய காற்றாலையை, சென்னிமலையை சேர்ந்த விஞ்ஞானி உருவாக்கி உள்ளார்.
ஈரோடு மாவட்டம், சென்னிமலையை சேர்ந்தவர் சுப்பிரமணியம், 44. பைக் மெக்கானிக்கான இவர், ஈரோடு கொங்கு பாலிடெக்னிக் கல்லூரி, ஆட்டோ மொபைல்ஸ் சோதனைக் கூடத்தில் மாணவர்களுக்கு வழிகாட்டியாக செயல்படுகிறார். பல நூல்களையும் எழுதியுள்ளார்.மெட்ரிக் கடிகாரம், பெட்ரோல் சிக்கன இன்ஜின், தானியங்கி சாண எரிவாயு கலன், வார காலண்டர்... என, பல கண்டுபிடிப்புகளை உருவாக்கியுள்ளார். இவர் வடிவமைத்த பெட்ரோல் சிக்கன இன்ஜினுக்கு, 2001ல் "தமிழ்நாடு விஞ்ஞானி' விருதும், அதே கண்டுபிடிப்புக்கு, 2005ல், தேசிய விருதும் கிடைத்தது.அந்த வரிசையில் தற்போது, எந்த திசையில் காற்று வீசினாலும் எளிதில் சுழன்று அதிகளவில் மின்சாரம் உற்பத்தி செய்யும் புதிய காற்றாலை இயந்திரத்தை சுப்பிரமணியம் வடிவமைத்துள்ளார்.
அவர் கூறியதாவது:இக்கருவியின் நான்கு இறக்கைகளையும், ஆங்கில "வி' எழுத்தின் வடிவத்தில் அமைத்துள்ளேன். இதன் இறக்கைகளை தேவைக்கேற்ப, இடத்துக்கேற்ப நீளமாக தயாரித்துக் கொள்ளலாம். நான்கு இறக்கைகளின் மேல், ஒன்றின் மீது ஒன்று என, தேவைக்கேற்ப அதிகமாக இறக்கைகளை பொருத்தி அதிக மின் உற்பத்தி பெற முடியும்."வி' வடிவத்தில் உள்ள ஒரு இறக்கைக்கும், அதற்கு மேல் பொருத்தப்படும் அடுத்த இறக்கைக்கும் இடையில், சிறிய இடைவெறி இருக்கும். இதனால் ஒரு பக்கத்தில் உள்ள இறக்கைகளை காற்று பலமாக தள்ளும்போது, அதன் எதிர்ப்புறம் இறக்கைகளுக்கு இடையே உள்ள இடைவெளியில் காற்று மிக எளிதாக ஊடுருவி வெளியேறி விடும். அதனால், தடையில்லாமல் இறக்கை சுழலும். அந்த வகையில் இக்கருவி மிக எளிமையாக, சாதாரண மக்களும் புரியும் மெக்கானிசத்தை கொண்டது.எந்த திசையில் இருந்து காற்று வீசினாலும் இக்கருவி சுழலும் வகையில் வடிவமைத்துள்ளேன். இதனால், ஆண்டு முழுவதும் மின் உற்பத்தி செய்யும் வாய்ப்பு உள்ளது. இந்த கருவியை வீட்டின் மேல் மாடியில் சிறிய அளவில் வைத்துக் கொள்ளவும், வியாபார ரீதியாகவும் மின் உற்பத்தி செய்ய முடியும்.இவ்வாறு சுப்பிரமணியம் கூறினார்.

நன்றி : தினமலர்

அட நல்ல விசயமா இருக்கே
எப்படியோ மின்சார பிரச்சனை தீர்ந்தா சரி