கிரிக்கெட்டை வைத்து ஜேட்லி, ஜெய்ராம் ரமேஷ் நட்பு ரீதியான கலாய்ப்பு: மாநிலங்களவையில் ருசிகரம்

மாநிலங்களவையில் அருண் ஜேட்லியும் காங்கிரஸ் கட்சியின் ஜெய்ராம் ரமேஷும் கிரிக்கெட் வார்த்தைகளைக் கொண்டு ஒருவரையொருவர் நட்பு முறை கலாய்ப்பில் ஈடுபட்டனர்.

மாநிலங்களவையில் பிரியாவிடை உரையாற்றிய காங்கிரஸின் ஜெய்ராம் ரமேஷ் கூறும்போது, “ஜேட்லி உண்மைகளை ஸ்பின் செய்வதில் மாஸ்டர். மகாத்மா காந்தி கதராடையை பின்னுவதை பற்றி மக்களுக்கு கூறினார் ஆனால் இவர் உண்மைகளை ஸ்பின் செய்பவர்.

இவரிடத்தில் (ஜேட்லியிடம்) பெய்லியின் தந்திரமும், பிரசன்னாவின் ஃபிளைட்டும், வெங்கட் ராகவனின் லெந்த்தும், சந்திரசேகரின் ஷூட்டர்களும் கலந்த ஸ்பின் திறமை உள்ளது.

கிரிக்கெட் வீரர் விஜய் மெர்ச்சண்ட் தான் ஓய்வு பெறும்போது ஏன் நன்றாக ஆடிக் கொண்டிருக்கும் போது ஓய்வு பெறுகிறீர்கள் என்று கேட்ட போது, ஏன் ஓய்வு பெறுகிறீர்கள் என்று ரசிகர்கள் கேட்கும் போது ஓய்வு பெறவேண்டும், ஏன் ஓய்வு பெறவில்லை என்று அவர்கள் கேட்கும் போது அல்ல என்றார்.” இவ்வாறு கிரிக்கெட்டை வைத்து ஜெய்ராம் ரமேஷ் பேச, பதில் அளித்த அருண் ஜேட்லி, தனக்கும் ஜெய்ராம் ரமேஷுக்குமான நட்பு மிகவும் பழமையானது என்றார்.

“ஆனால் இம்முறை அவரை கடைசியாக ஒருமுறை திருத்த விரும்புகிறேன், ஓய்வு குறித்து கூறியது விஜய் மெர்ச்சண்ட் அல்ல, சுனில் கவாஸ்கர்.” இதனைக் கேட்டவுடன் ஜெய்ராம் ரமேஷ் “இதுவும் ஒரு ஸ்பின் தான்” என்று கத்தினார்.

-
ஜெய்ராம் ரமேஷ் மாநிலங்களவையில் பிரியா விடை உரையாற்றிய போது…| படம்: பிடிஐ.
====

இதற்கு சிரித்தபடியே ஜேட்லி கூறும்போது, “அதைக்கூறியது சுனில் கவாஸ்கர்தான், அவர் ஒரு அருமையான இன்னிங்ஸை ஆடி உடனடியாக ஓய்வு அறிவித்தார். அப்போதுதான் அவர் இவ்வாறு கூறினார். ஆனால் இன்னும் நீண்ட இன்னிங்ஸ் உங்களிடம் (ஜெய்ராமிடம்) இருப்பதாக நான் கருதுகிறேன்.

நான் உங்களை ஒரு பொருளாதார தாராளவாதியாகவே தெரிந்து வைத்திருந்தேன், ஆனால் நீங்கள் பொருளாதார மரபுவாதியாக, பாரம்பரியவாதியாக மாறியுள்ளீர்கள். உங்கள் கருத்து என்னவாக இருந்தாலும், அவரது கட்சிக்கு இது தேவைப்படுகிறது. இவரது சேவைகளை அவரது கட்சி சரியான விதத்தில் பயன்படுத்தும் என்று நான் உறுதிபட நம்புகிறேன்” என்றார்.
-
தமிழ் தி இந்து காம்

.